Dövrənin və ilin son turu

Bu gün Topaz Premyer Liqasında 18-ci turun oyunları keçiriləcək. Azerisport.az xəbər verir ki, həm ikinci dövrəyə, həm də mövsümün ilk yarısına yekun vuracaq qarşılaşmalar 2014-cü ilin son oyunları olacaq.

Turun qarşılaşmaları eyni gündə baş tutacaq. “Xəzər Lənkəran” doğma meydanda AZAL-la üz-üzə gələcək. Ardıcıl 4 qarşılaşmada qalibi müəyyənləşdirə bilməyən komandalar 26-cı dəfə üz-üzə gələcək. Rəqiblər arasındakı son 5 matçda hər iki komanda qol sevinci yaşayıb. AZAL 8 matçdır meydanı qolsuz tərk etmir. “Xəzər Lənkəran” son 4 ev oyununda qalib gəlməyib və ardıcıl 5 dəfə 1 qol vurub. Cənublular bütövlükdə bu rəqibinə 13 dəfə qalib gəlib. 8 dəfə heç-heçə qeydə alınıbsa, "təyyarəçilər" 4 görüşdə 3 xala sevinib. Top fərqi də "ağ-yaşıllar"ın xeyrinədir - 33:18. Son turda "Qarabağ"a məğlub olan Oğuz Çətinin komandası həmin yenilgini unutdurmağa çalışacaq. AZAL isə uğursuz gedişata son qoymaq ümidindədir. İlk dövrədəki oyunda tərəflərin 1:1 hesablı heç-heçəyə razılaşdığını da xatırladaq.

Eyni saatda başlayacaq digər görüşdə “Qəbələ” və “İnter” qarşılaşacaq. Bu komandalar da indiyə qədər 25 dəfə qarşılaşıblar. “İnter” son 3 oyunda rəqibinə uduzmayıb. “Qəbələ”nin meydanındakı son 3 görüşdə isə hər iki komanda qol sevinci yaşayıb. Əyalət təmsilçisi evdəki son 5 qarşılaşmada qol vurub. Bütövlükdə, "Qəbələ" 5, "İnter" 13 qələbəyə sevindiyi halda, 7 matçda da tərəflər 1 xala razılaşıblar. Top fərqi də paytaxt təmsilçisinin xeyrinədir - 38:19. İlk dövrədə keçirilmiş oyunda "bankirlər" "Qəbələ"yə 4:0 hesabıyla üstün olmuşdular. Son turda "Neftçi"ni əzmkar qələbə ilə üstələyən "İnter" Qəbələdə də 3 xal əldə edib, liderlər qrupundakı mövqeyini yaxılaşdırmağa çalışacaq. Amma hələlik, Sənan Qurbanovun ümidinə qalan bölgə təmsilçisinin üzvləri də doğma azarkeşlərinin və yeni baş məşqçisi Roman Qriqorkuçun gözü önündə qələbə qazanmaq üçün əlindən gələni edəcək.

Son çempion “Qarabağ” “Sumqayıt”la münasibətlərinə aydınlıq gətirəcək. Cari mövsümün ilk turunda legioner limitinin pozulması üzündən texniki məğlubiyyət alan Ağdam klubu bu rəqibi ilə son iki görüşdə xal qazanmayıb. Lakin Ağdam klubu son 3 ev matçında böyükhesablı qələbə əldə edib. Ümumiyyətlə, “Qarabağ” “Sumqayıt”la matçlarda ya böyükhesablı qələbə qazanır, ya da xal itirir. Çünki onların bütün qələbələri 3 və daha çox top fərqilə qeydə alınıb. Ağdam klubunun 5 qələbəsi olduğu halda, "şəhərlilər" 3 dəfə 3 xala sevinib ki, onlardan da biri texniki qələbə sayəsində mümkün olub. Daha 1 görüşdə isə qalib müəyyənləşməyib. Top fərqində də Qurban Qurbanovun komandasının diqqətçəkən üstünlüyü var - 21:5.

Turun qapanış matçında “Simurq” “Bakı”nı qəbul edəcək. “Simurq” son 7 oyunda “Bakı”dan xal almayıb. Paytaxt təmsilçisi isə 11 oyundur uduzmur. Bütövlükdə, bu komandalar arasında 21 oyun baş tutub ki, onların 3-də Zaqatala klubu, 11-də "zolaqlıalr" qələbə qazanıb. 7 görüşdə isə tərəflər 1 xala razılaşıblar. Paytaxt klubu top fərqində də öndədir - 25:14. İlk dövrədə keçirilən oyunda heç kimin gözləmədiyi halda "Bakı" "Simurq"a 2:1 hesabıyla qalib gəlmişdi. Bu üzdən də Georgi Çixradzenin komandası mütləq həmin məğlubiyyətin revanşını almağa çalışacaq.

Topaz Premyer Liqası
18-ci tur
21 dekabr

15:00. “Xəzər Lənkəran” - AZAL
Hakimlər: Əliyar Ağayev, Rza Məmmədov, Akif Əmirəli, Rəhim Həsənov.
AFFA nümayəndəsi: Ramiz Abdullayev.
Hakim-inspektor: Əhmədağa Cabbarov.
“Xəzər Lənkəran” mərkəzi stadionu.

15:00. “Qəbələ” - “İnter”
Hakimlər: Fariz Yusifov, Munis Abdullayev, Elşən Acalov, Vüsal V. Əliyev.
AFFA nümayəndəsi: Məmmədəli Məmmədov.
Hakim-inspektor: Gülağa Cabarov.
Qəbələ şəhər stadionu.

15:30. “Qarabağ” - “Sumqayıt”
Hakimlər: İnqilab Məmmədov, Yaşar Abbasov, Nahid Əliyev, Orxan Məmmədov.
AFFA nümayəndəsi: Oqtay Abdullayev.
Hakim-inspektor: Xaqani Məmmədov.
Bakı. Tofiq Bəhramov adına Respublika stadionu.

17:00. “Simurq” - “Bakı”
Hakimlər: Ömər Paşayev, Azər Əsgərov, Mübariz Haşımov, Ramil Diniyev.
AFFA nümayəndəsi: Əsgər Əmirəliyev.
Hakim-inspektor: Şahin Cəfərov.
Zaqatala şəhər stadionu.
 

Bombardirlər:
8 - Mikel Alvaro (“İnter”).
7 - Nurlan Novruzov ("Bakı"), Məhəmməd Qurbanov (“Sumqayıt”).
6 - Draqan Çeran ("Simurq"), Junior Nildo ("İnter").
5 - Cavid Hüseynov ("Qəbələ").