Elnur Məmmədov: Neftçi AZAL-ı darmadağın edəndə, Arif Əsədovu qınayan yox idi
"Neftçi"nin vitse-prezidenti Elnur Məmmədov azarkeşlərin komandanın baş məşqçisi Arif Əsədovu istefaya səsləməsinə münasibət bildirib. Azerisport.az saytına açıqlamasında o, bunları söyləyib:
"Məşqçiyə bir oyuna görə qiymət vermək düzgün deyil. Bəli, təəssüf ki, 1:0 hesabıyla öndə olduğumuz oyundan məğlub ayrıldıq. Amma baxın görün neçə futbolçumuz heyətdə yox idi. Buna görə Əsədov da eksperimentlər etmək məcburiyyətində qalmışdı. Komandanın ikinci hissədə müdafiə futbolu oynadığı barədə fikirlərlə də razı deyiləm. AZAL üzərində 4:0 hesablı qələbə qazananda Əsədovu heç kim müdafiə futboluna görə qınamamışdı. Digər tərəfdən, "Qarabağ"la "İnter" öz baş məşqçilərinin rəhbərliyi altında beş ildən çoxdu oynayır. Belə sabitlik oyunçular üçün çox vacibdir. Əsədov isə cəmi bir neçə aydır "Neftçi"yə gəlib və komanda ilə toplanış belə keçməyib. Onun əlində olan indiki heyəti isə əvvəlki məşqçi formalaşdırmışdı. Bruno Bertuççi kimi aparıcı futbolçu komandadan ayrılıb. Əsədov yanvarda toplanış keçirəcək. Onun işinə də məhz yanvardan sonra keçiriləcək oyunlara görə qiymət vermək lazımdır. Transferlər barədə indidən nəsə demək çox tezdir. Rəhman Hacıyevə gəlincə, o, "Neftçi"yə keçməyəcək".
