Namiq Yusifov: Əsas odur ki, Azərbaycanı Avropada layiqincə təmsil etdik
"Qarabağ"ın yarımmüdafiəçisi Namiq Yusifovun azerisport.az saytına müsahibəsi
- "Xəzər Lənkəran"la oyundan nə gözləyirsiniz?
- Ağır oyun olacaq. Çünki rəqib yaxşı formadadır. Ancaq bizim əsas hədəfimiz bu oyundan 3 xalla ayrılmaqdır. Qələbə qazanıb "Qəbələ"yə məğlubiyyəti unutdurmaq istəyirik.
- "Qəbələ"yə məğlubiyyəti Milan "İnter"i ilə Avropa Liqasındakı oyunda üzləşdiyiniz haqsızlığın psixoloji təsiri saymaq olar?
- Cavab vermək çətindir. Mümkündür ki, həmin oyunun təsiri oldu. Əslində, birinci yarıda yaxşı çıxış etdik, amma ikinci hissədə oyunumuz qətiyyən alınmadı. Rəqib isə əksinə, yaxşı motivasiya ilə oynayırdı.
- Milanlılarla oyundan sonra komandada atmosfer necəydi?
- Bütün gecəni yata bilmədim. İndi də həmin oyunu xatırlayanda ətim ürpəşir. Amma nə etmək olar.
- Bəs komandanızın tam özünə gəlməsi üçün nə qədər vaxt lazım gələcək?
- Biz növbəti mövsümdə də avrokuboklarda oynamaq istəyirik. Buna görə də indidən tam olaraq çempionata köklənməyimiz lazımdır.
- Avrokuboklarda belə bir ədalətsizliklə üzləşəcəyinizi gözləyirdiniz?
- Xeyr. Hələ avrokuboklarda mübarizəyə başlayan zaman sadəcə, layiqli mübarizə aparmaq, özümüzü göstərmək istəyirdik. Sonra gördük ki, daha artığına nail ola biləcəyimizi gördük. Qrupdan çıxa bilərdik. Amma belə bir aqibətlə üzləşəcəyimiz ağlımıza da gəlməzdi.
- Bəziləri bu hadisədə siyasi amillərin olduğunu deyir...
- Əslində nəyə görə belə olduğunu bir Allah bilir. Amma nə oldusa, geridə qaldı. Görək, UEFA fevralın 5-də nə qərar qəbul edəcək. Ola bilər ki, bizim üçün yaxşı xəbər gəlsin. Əsas odur ki, Azərbaycanı Avropada layiqincə təmsil edə bildik.
- Ötən gün ölkə başçısı İlham Əliyevin qəbulunda oldunuz. Görüş necə keçdi?
- Hər şey əla keçdi. Prezident bildirdi ki, bu heç-heçəmiz onun üçün qələbəyə bərabərdir, komandamız növbəti mərhələyə çıxmağa layiq idi. Maraqlı görüş oldu. Bizə də xoş idi.
