Ayaz Quliyev: Azərbaycanı az sevməsəm də, Rusiya yığmasını seçirəm

Rusiyanın gənclərdən ibarət yığmasının və Moskva "Spartak"ının yarımmüdafiəçisi Ayaz Quliyev Azərbaycan millisində oynamaqda maraqlı deyil. Azerisport.az saytına müsahibəsində o, bunu özü bəyan edib:

"Azərbaycan yığmasına keçməyi mənə hələ heç kim təklif etməyib. AFFA-dan da mənə zəng edən olmayıb. Əgər mənə həm Rusiya, həm də Azərbaycan yığmasından dəvət gəlsə, Rusiyanı seçəcəyəm. Çünki artıq üç ildir bu ölkənin gənclərdən ibarət komandalarında oynayıram. Hər şeyi bir kənara qoyub, başqa bir komandaya gedə bilmərəm. Məni düzgün başa düşün, Azərbaycanı Rusiyadan az sevmirəm. Amma seçimim Rusiyadan yanadır".

Qeyd edək ki, bir müddət öncə Rusiyanın gənclərdən ibarət yığmasının baş məşqçisi Dmitri Xomuxa Ayazla bağlı açıqlama vermişdi: "Onun seçim imkanı var. Qərarı özü verəcək. Ayaz məndən məsləhət almaq istəsə, ona ilk növbədə Azərbaycanda oynayacağı halda Rusiyada legioner statusu daşıyacağını xatırladacağam. Belədə o, digər legionerlərlə rəqabət aparmalı olacaq. Klubunda əsas heyətə düşməsi çətin olacaq. Bu üzdən də təbii ki, mən Quliyevin Rusiya vətəndaşı olaraq qalmasını və əsas yığmaya qədər yüksəlməsində maraqlıyam".

Ayaz bizimlə söhbətdə yığmanın baş məşqçisi ilə belə bir söhbətinin olmadığını bildirdi.

Qeyd edək ki, bir müddət öncə eyni səbəblərdən "Zenit"in hücumçusu Ramil Şeydayev də Azərbaycanı yox, Rusiya yığmasını seçdiyini bəyan etmişdi.