Çempionun Lənkəran sınağı və ya derbilər turu

Bu gün və sabah Topaz Premyer Liqasında 17-ci turun oyunları keçiriləcək. Azerisport.az xəbər verir ki, “Simurq”un istirahət edəcəyi turda 4 qarşılaşma baş tutacaq.

Turun açılış matçı Bakıda reallaşacaq. Paytaxtın eyniadlı komandası öz meydanında AZAL-ı qəbul edəcək. 6 oyundur ki, rəqiblərinə qalib gələ bilməyən “zolaqlılar” “təyyarəçilər”lə oyunda istəklərinə nail olmağa çalışacaqlar. Ümumiyyətlə, indiyə qədər 23 dəfə paytaxt derbisində üz-üzə gələn komandaların oynunda 10 dəfə meydandan 3 xalla ayrılan “Bakı” bu mənada rəqibindən 2 qələbə çox qazanıb. 5 oyun isə heç-heçə başa çatıb. Son 3 qarşılaşmada AZAL xal qazana bilməyib. Paytaxtın eyniadlı təmsilçisi isə 4 görüşdür meydanı qolsuz tərk etmir. Top fərqi də "zolaqlılar"ın xeyrinədir - 22:19. İlk dövrədəki oyunda da məhz "Bakı" qələbəyə sevinən tərəf olmuşdu. "Təyyarəçilər"in həmin məğlubiyyətin qisasını almağa çalışacağı şübhə doğurmur.

İkinci oyun günündə öncə “Sumqayıt” evdə “Qəbələ”ni qəbul edəcək. Dorinel Muntyanunun gedişindən sonrakı ilk sınağında öz meydanında lider “Qarabağ”ı məğlub edən və 2-ci dövrədə ilk qələbəsini qazanan qəbələlilər bu turda meydana 3 xal üçün çıxacaqlar. İndiyə kimi 9 dəfə üzləşən komandaların oyununda "qırmızı-qaralar" 8 qələbə qazanıb. 1 oyunda isə “kimyaçılar” meydanı qələbə ilə tərk edib. Heç vaxt sülh bağlamayan komandaların duellərində "Qəbələ" top fərqində də çox öndədir - 22:7. İlk dövrədə bu komandaların duelini qəbələlilər qazanmışdı - 3:1.

Turun daha prinsipial qarşılaşması Lənkəranda baş tutacaq. “Xəzər Lənkəran” doğma divarlar arasında son çempion, indiki lider “Qarabağ”ı sınağa çəkəcək. Ötən tur xal itirən hər iki komanda zədəli oyunçuların çoxluğundan əziyyət çəkməsinə baxmayaraq, qalib gəlməyə çalışacaq. 30-cu dəfə qarşılaşacaq komandaların duelində 4 oyun sülhlə yekunlaşıbsa, bundan əvvəlki oyunlarda qələbə sayına görə 13-12 ağdamlılar üstündür. Top fərqində də “atlılar” rəqibini 34:31 hesabıyla üstələyir. Cənub klubu doğma meydan amilindən yararlanıb, ağdamlılar növbəti məğlubiyyəti yaşatmağa çalışacaq. Qurban Qurbanovun komandası isə Avropa Liqasında yaşadığı şoku, son turda "Qəbələ"yə məğlubiyyəti unutdurmaq üçün çətin səfərdən 3 xalla qayıtmağa səy göstərəcək.

Turun digər paytaxt derbisi "İnter Arena"da baş tutacaq. Paytaxtın “İnter” və “Neftçi” komandaları münasibətlərinə aydınlıq gətirəcək. Liderlər sırasında qərarlaşan komandalar üçün bu oyun çox vacibdir. Belə ki, “Qarabağ”ın Lənkərandakı qarşılaşmada mümkün xal itkisi bu komandaların turnir cədvəlinin ilk pilləsinə qalxmasına zəmin yarada bilər. Bu vaxta kimi 40 dəfə qarşılaşan rəqiblərin duelində “ağ-qaralar” 19, ”bankilər” isə 8 dəfə meydandan qələbə ilə ayrılıblar. 13 görüş isə bərabərliklə başa çatıb. "Neftçi"nin top fərqində də diqqətçəkən üstünlüyü mövcuddur - 60:36. Bu iki klub ilk dövrədə qolsuz bərabərliyə razılaşmışdı.

Topaz Premyer Liqası
17-ci tur
17 dekabr

14:00. “Bakı” - AZAL
AFFA nümayəndəsi: Eldar Qasımov.
Hakim-inspektor: Məhəmməd Məmmədov.
“Bakı” FK-nın təlim-məşq bazasının stadionu.

18 dekabr

15:00. “Sumqayıt” - “Qəbələ”
AFFA nümayəndəsi: Mübariz Hüseynov.
Hakim-inspektor: Murad Məmmədov.
Sumqayıt. “Kapital Bank Arena”.

17:00. “Xəzər Lənkəran” - “Qarabağ”
AFFA nümayəndəsi: Maşallah Əhmədov.
Hakim-inspektor: Əli Hüseynov.
“Xəzər Lənkəran” mərkəzi stadionu.

17:00. “İnter” – “Neftçi”
AFFA nümayəndəsi: Elbrus Abbasov.
Hakim-inspektor: Rövşən Əhmədov.
Bakı. “İnter Arena”.
 

Bombardirlər:
8 - Mikel Alvaro (“İnter”)
6 - Nurlan Novruzov ("Bakı"), Məhəmməd Qurbanov (“Sumqayıt”), Draqan Çeran ("Simurq").