Aqil Məmmədov: Neftçiyə keçidim milliyə qayıtmağıma da kömək edəcək
"Bakı"nın qapıçısı Aqil Məmmədov "Neftçi"yə keçidi ilə əlaqədar olaraq azerisport.az saytının suallarını cavablandırıb.
- "Neftçi"yə keçidinizə nə səbəb oldu?
- "Neftçi" flaqmandır. Təklif də sərfəli idi. Şadam ki, bütün çətinliklərdən sonra belə bir güclü komandanın qapısını qoruyacağam. Ümidləri doğrultmağa çalışacağam.
- Deyilənə görə, "Neftçi" sizə "Bakı"da bir oyun çıxış etməyə icazə verib...
- Bəli, bunu öncədən razılaşdırmışdıq. Buna görə klub prezidenti Sadıq Sadıqova təşəkkürümü bildirirəm.
- Saşa Stamenkoviçlə rəqabətdən çəkinmirsiniz?
- İnkişaf üçün rəqabət lazımdır. Mən daha çox məşq etməyə çalışacağam. Qərar isə baş məşqçilərin olur. Bu barədə Arif Əsədovla söhbət etməmişik. Hələ tezdir.
- Bəs "Bakı"da sizi kim əvəz edəcək?
- Elxan Əhmədov. Gözəl qapıçıdır. O, gələcəkdə özünü yaxşı tərəfdən göstərə biləcək.
- "Neftçi"yə keçidiniz sizi milliyə qaytarmağa kömək edə bilər?
- Əlbəttə. Əgər "Neftçi"də sabit çıxış etsəm, milliyə qayıtmağım mümkündür. Amma hər şeyi zaman göstərəcək.
- "Bakı"dan gedəcəyinizi gözləyirdiniz?
- "Bakı" mənim üçün doğma komandadır. Klubun bu vəziyyətə düşməsi mənim üçün çox ağırdır, ürəyim dözmür. Halbuki, komandada çoxlu sayda yaxşı futbolçu var.
- Hafiz Məmmədovla danışdınız?
- Bəli, o, bu keçidə öz razılığını verdi.
- Düşünmürsüz ki, sizin ardınızca "Bakı"nın digər futbolçuları da getməyə qərar versin?
- Onların çoxu gəncdir. Hamısı oynamalıdır. Əlbəttə, onların bəzisi başqa klublarda da çıxış edə bilərlər. Amma mənə elə gəlir ki, mövsümün sonunadək elə "Bakı"da qalmaları daha yaxşı olardı.
