Jaba: Bura gələndə Bakının bu qədər probleminin olduğunu bilmirdim
"Bakı"nın hücumçusu Jaba Topaz Premyer Liqasının 16-cı turu çərçivəsində qarşılaşdıqları "Xəzər Lənkəran"la oyundan sonra fikirlərini açıqlayıb. Azerisport.az saytına açıqlamasında o, bunları söyləyib:
"Yaxşı oyun alındı. Rəqib səviyyəli futbolçulardan təşkil olunub. Çoxlu legioneri var. Bu baxımdan onların üstünlüyü daha çox idi. Bizdə isə yerli futbolçular çoxluq təşkil edir. Bu da müəyyən çətinliklər yaradır".
Jaba oyun zamanı Nurlan Novruzov və Nuran Qurbanovla aralarına yaranan narazılığa da aydınlıq gətirib: "Burada ciddi heç nə yoxdur. Futbolda hər şey olur. Normal hadisədir. Pul yoxdur, problemlər isə çoxdur. Bütün bunlar oyunumuza təsir edir. Maliyyə problemlərinə baxmayaraq, müqaviləm var, buradayam. "Bakı"dakı taleyimə Hafiz Məmmədovla görüşdükdən sonra aydınlıq gələcək. Məni bu komandaya o çağırıb. Etiraf edim ki, gələndə klubun bu qədər probleminin olduğunu bilmirdim. Amma ümid edirəm ki, hər şey qaydasına düşəcək və "Bakı" da əvvəlki günlərini qaytaracaq".
