Sirxayev: Qarabağa görə üzüldüm

Futbol üzrə Azərbaycan yığmasının sabiq yarımmüdafiəçisi Narvik Sirxayev "Qarabağ"ın Avropa Liqasının qrup mərhələsi çərçivəsində İtaliya "İnter"inə qarşı keçirdiyi son oyunda üzləşdiyi hakim ədalətsizliyindən danışıb. Azerisport.az xəbər verir ki, o, bunları söyləyib:

"Qarabağ"ın yerində istənilən klub ola bilərdi. Ona görə də mənim üçün çox üzücüdür. Hakimlərin işini şərh etmək istəməzdim. Amma bu, danılmaz faktdır ki, komanda növbəti mərhələyə çıxmağa layiq olduğu halda, buna imkan verilmədi. Təəssüf ki, son dövrlər belə hadisələr tez-tez təkrarlanır. Siyasəti bura qarışdırmaq istəməzdim. Hətta növbəti mərhələyə Ukrayna "Dnepr"i yüksəlsə də. Sadəcə, bu oyuna gələn, komandasını dəstəkləyən azarkeşlərə yazıqdır. Futbolçular, məşqçilər, klub rəhbərliyi də bu qədər əziyyət çəkmişdilər, bütün güclərini qoymuşdular. Özü də "İnter" kimi adlı-sanlı rəqibə qarşı oynayırdılar. Belə bir komandaya qalib gəlmək prestijli idi. Üstəlik, buna nail olacağı halda Avropa Liqasının 1/16 final mərhələsinə vəsiqə qazanılacaqdı. Ona görə də mən çox üzüldüm. "Qarabağ" Miroslav Zelinkadan şikayət edəcək? Qoy lazım olan orqanlara müraciət etsinlər. Təbii ki, bunu cavabsız qoymaq olmaz. Amma fikrimcə, heç nə dəyişməyəcək. Maksimum, hakimlərə hansısa sanskiya tətbiq olunacaq. Nəticə isə ləğv olunmayacaq".