Vəli Qasımov: Eşitmişəm ki, Dnepr də ofsayddan qol vurub, odu ki, burada siyasət də rol oynaya bilər

Futbol mütəxəssisi Vəli Qasımovun azerisport.az saytına müsahibəsi

- "Qarabağ"ın Avropa Liqasındakı İtaliya "İnter"i ilə son oyunu təmiz qolumuzun sayılmaması ilə nəticələndi. Siz həmin epizodla bağlı nə deyə bilərdiniz?
- "Qarabağ"a qarşı doğrudan da ədalətsiz hərəkət etdilər. Bütövlükdə, oyuna görə "Qarabağ" "İnter"dən zəif təsir bağışlamadı, əksinə yaxşı çıxış etdi. Qol da təmiz idi. Burada heç mübahisəyə də ehtiyac yoxdur. Sadəcə, hakim yanlış qərarı ilə bütün arzularımızın üzərindən xətt çəkdi. Ağdamlıları bu şansdan məhz hakimlər məhrum etdilər.

- Kimlərsə bunda siyasi amillərin olduğunu deyir. Siz bu nəzəriyyə ilə razısız?
- Düzü, bu barədə dəqiq söz deməkdə çətinlik çəkirəm. Eşitmişəm ki, "Dnepr" də Kiyevdə "Sent-Etyen"ə ofsayddan qol vurub. Ola bilər ki, siyasi amillərin də təsiri var. Amma dəqiq nəsə demək olmur. Fakt isə budur ki, baş hakim "Qarabağ"ın növbəti mərhələyə yüksəlməsinə imkan vermədi. Amma hər şeyə rəğmən, Ağdam klubunu sərgilədiyi oyuna görə təbrik etmək olar.

- Futbolçu karyeranızda belə səhvlə rastlaşmışdınız?
- Etiraf edim ki, yox. Mən bunu əksini görmüşdüm.

- "Qarabağ" artıq UEFA-ya şikayət ünvanlayıb. Sizcə, ağdamlıların qələbəsi bərpa oluna bilər?
- Buna inanmıram. Futbolda bu və buna oxşar hadisələr çox olsa da, nəticə dəyişmir. Ən yaxşı halda hakimlərə ciddi cəza veriləcək. İstənilən halda "Qarabağ" öz oyunu ilə növbəti mərhələyə adlamağa layiq olduğunu göstərdi. Özü də təmsilçimiz bəxt sayəsində yox, öz zəhməti sayəsində buralara qədər irəliləmişdi.

- Bu mövsümü komandamız üçün uğurlu sayırsınız?
- "Qarabağ" bütün Azərbaycan klublarına Avropada necə oynamaq lazım olduğunu göstərdi. Əlbəttə, ağdamlıların bütün rəqiblərindən güclü olduğunu deyə bilmərik. Amma ən azından güclü rəqibləri ilə baş-başa mübarizə aparmağı bacardı. Bütövlükdə, komandanın çıxışını uğurlu hesab edirəm. Hətta növbəti mərhələyə yüksələ bilməsələr də belə.