Dodo: Qarabağ Avropa Liqasının pley-offuna çıxmağa layiq idi
"Qəbələ"nin yarımmüdafiəçisi Dodonun azerisport.az saytına müsahibəsi
- "Qarabağ"la oyundan nə gözləyirsiz?
- Bizi çətin rəqiblə ağır oyun gözləyir. Futbol elə oyundu ki, həmişə güclü komandalar qalib gəlmir. Biz meydanda bir-birimizlə anlayışlı oynasaq, "Qəbələ" yaxşı oyun sərgiləyə bilər. Belə olan halda nəticənin də yaxşı olması mümkündür.
- Dorinel Muntyanunun istefasını necə qarşıladınız?
- Bu, mənim üçün sürpriz oldu. Pis nəticələrə rəğmən, onun istefa verəcəyini düşünmürdüm. Buna tək mən təəccüblənmədim. Komanda yoldaşlarım da bunu gözləmirdilər.
- Sizcə, niyə onda "Qəbələ" ilə yaxşı nəticələr qazanmaq alınmadı?
- Deyə bilmərəm. Çoxlu səbəb göstərmək olar. Bir şey aydındı ki, o da nəticələrin pis olmasıdır.
- "Qarabağ" - "İnter" matçına baxdınız?
- Ağdamlıların bu mövsüm avrokuboklardakı çıxışı mənim xoşuma gəldi. Bir növ "Qarabağ"ın fanatına çevrilmişdim. Onlar möhtəşəm oyun sərgiləyirdilər.
- "İnter"lə oyunda sayılmayan qol barədə nə deyə bilərsiz?
- Onların qələbəsini əldən aldılar. Komanda Avroliqanın pley-offuna çıxmağa layiq idi. Turniri bu şəkildə tərk etmək çox üzücüdür.
- Rəqibiniz psixoloji cəhətdən pis vəziyyətdədir...
- Biz 11 nəfərlə 11 nəfərə qarşı oynayacağıq. "Qarabağ" yaxşı komandadır. "Qəbələ"də də yaxşı oyunçular var. Biz maksimum güc qoyacağıq ki, bu yaxşı komandaya qalib gələk.
