Topaz Premyer Liqasında 16-cı tur həyacanı

Bu gün və sabah Topaz Premyer Liqasında 16-cı turun oyunları keçiriləcək. Azerisport.az xəbər verir ki, 3 oyun Bakıda, biri isə paytaxtdan kənarda baş tutacaq.

İlk oyun günündə “Simurq” “İnter”i qəbul edəcək. 22-ci görüşədək oyunların yarısından çoxunda qalib gələn “İnter” son duellərdə də üstündür. Bu komandanın hesabında 15 qələbə var. Bakılılar ardıcıl 4 matçdır ki, rəqibindən qol buraxmır. 3 qarşılaşmada "Simurq" üstün tərəf olubsa, daha üç oyunda heç-heçə qeydə alınıb. Komandaların son 5 matçında isə qonaqlar ən azı 1 xal əldə edir. Top fərqində də bakılıların böyük üstünlüyü var - 32:11. İlk dövrədə Bakıda baş tutan qarşılaşmada qolsuz heç-heçə qeydə alınmışdı. Elə Zaqataladakı görüşdə də hansısa komandanın ciddi üstünlüyünün olduğunu demək çətindir.

Çempionatın autsayderinə çevrilən “Bakı” “Xəzər Lənkəran”la üz-üzə gələcək. Rəqiblərin yubiley - 30-cu dueli ərəfəsində paytaxtın eyniadlı təmsilçisinin cüzi üstünlüyü var. "Zolaqlılar" indiyədək 9 qələbə qazandıqları halda, 8 dəfə də uduzublar. 12 qarşılaşmada da tərəflər meydanı 1 xalla tərk ediblər. “Xəzər Lənkəran” qələbə sayında tarazlıq yaratmağa, “Bakı” isə 10-cu dəfə 3 xal əldə etməyə yaxındır. Cənublular son qarşılaşmada böyük hesabla qalib gəlsə də, 5 ildir səfərdə qələbə qazanmır. Belə ki, bakılılar evdəki son 8 qarşılaşmada yenilməyib. Top fərqində isə cənublular üstündürlər - 32:29. "Xəzər Lənkəran"ın ilk dövrədə keçirilmiş oyunda 4 cavabsız qolla qalib gəldiyini də xatırladaq.

Son ölkə çempionu “Qarabağ” səfərdə “Qəbələ”nin qonağı olacaq. Qəbələlilər Ağdam klubu ilə son 7 oyunda xal qazana bilməyiblər. Bu qələbə seriyasının son 3 görüşündə ağdamlılar qol da buraxmayıb. Ümumilikdə isə 26-cı duel öncəsi “Qarabağ” böyük üstünlüyə malikdir - 13 qələbə. 5 dəfə "Qəbələ" 3 xala sevindiyi halda, 7 qarşılaşmada da sülh qeydə alınıb. Top fərqi də Qurban Qurbanovun komandasının xeyrinədir - 35:21. Ağdamlılar Avroliqadakı çıxışını bəxtsiz şəkildə başa vurduğundan ola bilər ki, qonaqlar psixoloji baxımdan bu oyuna hazır olmasınlar və meydan sahibləri bundan yararlansın. Amma məsələ burasındadı ki, "Qəbələ"də də buna oxşar vəziyyət var. Uğursuz gedişatın məntiqi nəticəsi olaraq Dorinel Muntyanu istefa verib və hazırda komandanın baş məşqçisi yoxdur. Bu üzdən də sözügedən komandaların duelində kimin güləcəyi maraqla gözlənilir. İlk dövrədəki oyunda "Qarabağ" 2:0 hesabıyla üstün olmuşdu.

Nəhayət, turun qapanış matçında “Neftçi” “Sumqayıt”la münasibətlərinə aydınlıq gətirəcək. 10-cu dəfə qarşılaşacaq komandaların oyunlarında “Neftçi”nin üstünlüyü var - 5 qələbə. 1 dəfə heç-heçəyə razılaşan tərəflərin duellərində 3 dəfə də "Sumqayıt" qələbəni bayram edən tərəf olub. Öz meydanındakı 4 qarşılaşmada cəmi 1 dəfə uduzan “ağ-qaralar” top fərqində daha böyük fərqə nail olub - 21:10. Lakin “Sumqayıt” son iki səfər matçında rəqibinə uduzmayıb. Baxmayaraq ki, ilk dövrədəki oyunda "Neftçi" minimal hesablı qələbəyə sevinmişdi.

Topaz Premyer Liqası
16-cı tur
13 dekabr (şənbə)

“Simurq” – “İnter”
Hakimlər: Orxan Məmmədov, Mehman Mahmudov, Munis Abdullayev, Əliyar Ağayev.
AFFA nümayəndəsi: Nüvər Xasıyev.
Hakim-inspektor: Fazil Mürşüdov.
Zaqatala şəhər stadionu. Saat 17:00.
 
14 dekabr (bazar)

“Bakı” – “Xəzər Lənkəran”
Hakimlər: Vüsal V. Əliyev, Namiq Hüseynov, Coşqun Həsənov, Elvin Əsgərov.
AFFA nümayəndəsi: Vaqif Davudov.
Hakim-inspektor: Xaqani Məmmədov.
“Bakı” FK-nın Təlim-Məşq Bazasının stadionu. Saat 14:00.
 
“Qəbələ” – “Qarabağ”
Hakimlər: Fariz Yusifov, Yaşar Abbasov, Nahid Əliyev, Rəhim Həsənov.
AFFA nümayəndəsi: Şaiq Həmidov.
Hakim-inspektor: Asim Xudiyev.
Qəbələ şəhər stadionu. Saat 15:00.
 
“Neftçi” – “Sumqayıt”
Hakimlər: Ramil Diniyev, Mübariz Haşımov, İsgəndər Əliyev, Ramil Əhmədov.
AFFA nümayəndəsi: Ramiz Mustafayev.
Hakim-inspektor: Gülağa Cabarov.
Bakı. “Bakcell Arena”, 17:00.
 

Bombardirlər:
8 - Mikel Alvaro (“İnter”).
6 - Nurlan Novruzov ("Bakı"), Məhəmməd Qurbanov (“Sumqayıt”).
5 - Draqan Çeran ("Simurq").