"Hətta ən bərbad hakim də elə qərar qəbul etməzdi"
"Qarabağ"ın sabiq hücumçusu Samir Musayev Ağdam klubunun İtaliya "İnter"inə qarşı keçirdiyi oyunda təmiz qolunun sayılmamasına münasibət bildirib. Azerisport.az saytına açıqlamasında o, bunları söyləyib:
"Burada danışılası bir şey yoxdu axı. Hətta ən bərbad hakim də belə bir qərar qəbul etməzdi. Bu hadisə futbol adına qara ləkədir. Hətta dünyanın ən yaxşı hakimləri də referinin niyə elə qərar qəbul etdiyini anlaya bilmirlər. Kimsə deyə bilər ki, yan xətt hakimi səhvə yol verib. Bəs baş hakim hara baxırdı? Axı hər şey onun gözləri önündə baş verdi. Əlbəttə, bizim sözlərimiz heç nəyi dəyişməyəcək. Bu barədə ancaq UEFA qərar verə bilər. O da "Qarabağ" şikayət etsə. Bütün komandanın, futbolçuların çəkdiyi əziyyət yerə vuruldu. Əgər UEFA belə kobud səhvləri həll edə bilmirsə, onda öz qaydalarında dəyişiklik etsin".
