Tahir Gözəl: Bu, təsadüfi səhv olmasa da, əlimizdə sübut yoxdur
Bu gün "Qarabağ"ın bazasında jurnalistlər üçün mətbuat konfransı keçirilib. Azerisport.az xəbər verir ki, ötən gün Avropa Liqasının qrup mərhələsi çərçivəsində İtaliya "İnter"inə qarşı keçirilmiş oyunda təmiz qolun sayılmamasına həsr olunan tədbirdə klubun vitse-prezidenti Tahir Gözəl, direktor Əmrah Çəlikəl və AFFA Hakimlər Komitəsinin sədri Xaqani Məmmədov iştirak edib.
Tahir Gözəl çıxışında bunları qeyd edib: "Həmin epizodu biz oturduğumuz yerdən aydın görmək çox çətin idi. Amma sonradan hər şeyi detallarına qədər görmək şansımız oldu. Hakim təmiz qolu saymadı. "Qarabağ" dekabrın 15-də keçiriləcək püşkatmada olmalıydı. Mütləq UEFA-ya şikayət edəcəyik. Bu, nəticəyə təsir etməsə də belə, haqq-ədalət öz yerini tapmalıdır. Çünki bizim tarixi qələbəmizi əlimizdən aldılar.
"Qarabağ" bundan sonra da avrokuboklardakı çıxışını davam etdirəcək. Biz yüksək yerlər uğrunda mübarizə aparacağıq. Əgər belə bir haqsızlıqla Milan "İnter"i üzləşsəydi, əminəm ki, hər şey tam fərqli olardı.
Belə səhvlər təsadüfi olmur. Amma bizim əlimizdə sübut yoxdur".
