Rəşad Sadıqov: Sayılmayan qol olmasaydı, bəlkə də bu qədər məyus olmazdıq

Azərbaycan çempionu "Qarabağ"ın kapitanı Rəşad Sadıqov Avropa Liqasının qrup mərhələsi çərçivəsində İtaliya "İnter"inə qarşı keçirdikləri oyundan sonra azerisport.az saytının suallarını cavablandırıb:

- Son saniyələrdə vurduğunuz qolun sayılmaması ilə bağlı nə deyə bilərsiz?
- Riçard Almeydanın zərbəsindən sonra bir anlığa növbəti mərhələyə adladığımızı düşündüm. Amma görünür, qismət deyilmiş.

- Komanda bunu necə qarşıladı?
- Oyundan sonra hamı dilxordu. Hakimin niyə belə hərəkət etdiyini hələ də başa düşə bilmirik. Hamı sevinərkən mən baş hakimə baxım. O, təxminən 10-15 saniyə yan xətt hakiminə baxıb ondan qərar gözləyirdi. Ondan bir neçə dəfə niyə belə qərar qəbul etdiyini soruşdum.

- Yəqin ki, bunu unutmaq çox çətin olacaq...
- Bəli. Çünki bir də nə vaxt belə imkan ələ düşəcəyini bilmirik. Mümkündü ki, mən hətta karyeramda bir daha bunu yaşaya bilməyəcəm. Nə deyəcəyimi bilmirəm. Qələbə qazanmaq üçün hər şeyi etdik. Oyundan öncə hamı rəqibin ikinci heyətlə oynayacağını deyirdi. Biz də zədəlilərimizin çox olması səbəbindən yarımmüdafiədə müdafiəçi oynadırdıq. Hamı "Qarabağ"ın braziliyalılardan asılı olduğunu deyirdi. Amma bu gün meydanda cəmi bir braziliyalı var idi.

- Oyun barədə nə deyə bilərsiz?
- Fikrimcə, ağıllı futbol oynadıq. Bilirdik ki, "İnter"in üzvləri baş məşqçiyə özlərini göstərməyə çalışacaqlar. Səliqəli müdafiə olunmağa, əks-hücumda oynamağa çalışdıq. Yaxşı qol vəziyyətlərimiz də oldu. Bəlkə də son saniyələrdəki qol olmasaydı, biz növbəti mərhələyə çıxa bilməməyimizə bu qədər təəssüflənməzdik. Bunu unutmaq üçün bəlkə də illər lazım gələcək. Hətta "İnter"in futbolçusu da etiraf etdi ki, həmin epizodda qol var idi.

- Oyun zamanı "Dnepr" - "Sent-Etyen" matçının nəticəsindən xəbəriniz var idi?
- Ukrayna klubunun qol vurduğunu bilən kimi hücuma atıldıq. Sonradan fransızların hesabı bərabərləşdirdiyini eşitdik. Hətta azarkeşlər də sevindilər. Amma hesabın dəyişmədiyi dəqiqləşən kimi yenidən irəli getdik, qol vurduq... Uşaqlar sağ olsunlar. Məncə, bu oyun Avroliqadakı çıxışımız dövründə ən yaxşı idi.