Şahin Diniyev: Qarabağın İnterə qalib gəlməsi mümkündür
Məşqçilər Şurasının üzvü, veteran futbolçu Şahin Diniyev azərisport.az saytına müsahibəsində Avroliqanın qrup mərhələsinin son turunda keçiriləcək "Qarabağ" - "İnter" görüşü barədə danışıb. Diniyev Azərbaycan çempionunun uğur qazanacağına inandığını deyib:
"Qarabağ" artıq maksimum nəticə göstərib. Bu gün azarkeşlərin qələbə arzulaması normaldı. Ağdam təmsilçisi gözəl oyunuyla fanatların rəğbətini qazanıb. Niyə də olmasın? Bu gün "Qarabağ"ın qələbəsi mümkündür. Əlbəttə, bunun üçün mümkün qədər dəqiq və səhvsiz oynamaq lazımdır. Komandamız necə oynamağı gözəl bilir. Rəqib güclü olsa da, biz də zəif deyilik. Komandamızın uğur qazanacağına inanıram".
Diniyev "Qarabağ"ın heyətində ən çox Reynaldonun oynamayacağına görə təəssüfləndiyini qeyd edib: "Reynaldonun olmaması oyuna təsir edə bilər. Bu halda Vüqar Nadirovdan çox şey asılı olacaq. Ümumiyyətlə "Qarabağ" komanda oyunu göstərir. Məhz buna görə də uğur qazanır. "İnter"in təqdimata ehtiyacı yoxdu. Biz qələbəni daha çox istəməliyik. Rəqibin ikinci heyətlə gəlməsini söyləyənlərlə razılaşmıram. Hər bir komanda mövsümün əvvəlində siyahıya daxil etdiyi futbolçularla müqavilə imzalayır. Bu gün birinci və ya ikinci heyət yoxdu. "İnter"in futbolçusu hər zaman futbolçudu. İstənilən heyətlə olsa belə "İnter" elə "İnter"di".
Ukraynada keçiriləcək "Dnepr"-"Sent Etyen" matçına gəlincə Şahin Diniyev həmin oyun haqda düşünməməyi məsləhət gördü: "Biz gərək başqasının bizim üçün nəsə edəcəyini gözləməyək. Taleyimiz öz əlimizdədir. Bundan istifadə etmək lazımdır. Sözsüz son matç asan olmayacaq. Amma əgər düzgün və dəqiq oynasaq sevinmək imkanımız var. "Qarabağ"ın tarixi uğura imza atmağa imkanı var. Belə şans hər dəfə olmur".
Veteran futbolçu pley-offa çıxmaq şanslarımızın digər iki komandayla bərabər olduğunu dedi: "Hər iki oyun heç-heçə başa çatsa yenə biz sevinirik. Bu mənada gərək öz oyunumuzu göstərək. Bakıya gələn rəqib futbolçular özlərini yaxşı tərəfdən göstərməyə çalışacaq. Buna görə mütləq sona qədər oynamaq lazımdır. "Qarabağ"ın artıq müəyyən təcrübəsi var. Buna görə də öz gücümüzə inanmaq və oyunumuzu göstərmək vacibdir".
