RAİ: Qarabağ üçün son oyun çox vacibdir

İtaliyanın RAİ kanalı Avroliqanın qrup mərhələsinin son turunda "Qarabağ" - "İnter" matçıyla əlaqədar süjet hazırlayıb. Azerisport.az xəbər verir ki, süjetdə Azərbaycan çempionunun son oyuna xüsusi hazırlaşdığı qeyd olunub.

"İtaliya komandası üçün son matç o qədər önəmli deyil. Roberto Mançininin gəlişindən sonra bir qədər dəyişən neradzura artıq pley-offdadır. Deməli, Bakıdakı oyunun nəticəsi vacib deyil. Buna görə də "İnter" Azərbaycana uzun yolu 1 gün əvvəl qət etməyi qərara alıb. Bir gün əvvəl paytaxt Bakıya gələcək "İnter" cəmi 1 məşq edəcək.

Heyətə gəldikdə Mançini əsas heyətdən 4 futbolçunu səfərə aparacaq. Əsas məqsəd son oyunlarda meydanda olmayan futbolçuları yoxlamaqdır. Çünkı, qışda komandanı bəziləri tərk edə bilər. "İnter"dən fərqli olaraq Azərbaycan çempionu "Qarabağ" üçün bu oyun tarixinin ən vacibidir. Komanda ilk dəfə pley-offa çox yaxınlaşıb. Əgər "İnter" üçün Avroliqanı qazanmaq uğur sayılacaqsa, "Qarabağ" üçün qrupdan çıxmaq böyük nəticə olacaq. Komandanın heyətində əsas futbolçular Braziliyadan dəvət olunub. Onların çoxu zədəlidir. Komandaya azərbaycanlı məşqçi Qurban Qurbanov başçılıq edir.

"Qarabağ" ev oyunlarını Bakıdakı ən böyük stadionda keçirir. 32 min azarkeş həmin arenada bütün oyunlarda komandanı dəstəkləyir. Cari mövsüm "Qarabağ" çox uğurlu çıxış etdiyi üçün komanda Azərbaycanın ən sevimli klubuna çevrilib. Son çempionat matçında "Qarabağ" "Neftçi" ilə 0-0 oynayıb. Bu "Neftçi" 2 il əvvəl "İnter"lə San Siroda 2-2 oynayıb. O zaman da neradzura artıq pley-offa çıxmağı həll etmişdi.

"Qarabağ" - "İnter" matçı hər iki komanda üçün çətin olacaq. Azərbaycan çempionu növbəti mərhələyə çıxmağı arzulayır. "İnter"in futbolçuları isə özlərini sübut etmək istəyir".