Tuyqun Nadirov: Klublar Komitəsi futbolun inkişafı yolunda az rola malik olmayacaq
"Xəzər Lənkəran"ın vitse-prezidenti Tuyqun Nadirov bu gün keçirilmiş Klublar Komitəsinin ilk iclasından və onun sədri seçilməsindən danışıb. Azerisport.az saytına açıqlamasında o, bunları söyləyib:
"İclasda gizli səsvermə keçirildi, hər klub rəsmisi özündən başqa digərlərinə səs verdi. Səsvermə nəticəsində mən seçildim. Göstərilən dəstəyə görə təşəkkürümü bildirirəm. Komitə AFFA prezidenti Rövnəq Abdullayevin ideyası sayəsində yaradılıb. Bu, klub futbolunun inkişafına öz töhfəsini verməlidir, hər bir klubun maraqlarını ifadə etməlidir. Hər ay bir araya gəlməyə çalışacağıq. Dekabrın sonunda toplantımız olacaq. Görüşdə müxtəlif məsələləri müzakirə edəcəyik. Artıq klublar çempionatda baş verən olaylarla bağlı fikirlərini ayrı-ayrı yox, birgə bildirəcək. Mübahisəli məsələlər olanda Hakimlər və Hakim-inspektorlar Komitəsinə birgə müraciət edəcəyik. Fikrimcə, klub futbolunun inkişafı yolunda bu komitənin az rolu olmayacaq".
