Bilyaletdinov: Abışovun Azərbaycanda medallar uğrunda yarışması daha yaxşıdır, nəinki Rusiyanın ortabab klubunda oynaması

Rusiyanın "Rubin" klubunun baş məşqçisi Renat Bilyaletdinovun azerisport.az saytına müsahibəsi

- Ruslan Abışovun "Rubin"ə qayıtmasının təşəbbüskarı kimdir?
- Biz yanvarda ona baxmaq istəyirik. Hazırda isə o, "Qəbələ"də icarədədir.

- Siz Abışovun qayıtmasını istəyirsiniz?
- Bizə güclü futbolçular lazımdır. Klubumuza məxsus olan bütün futbolçuları sınaqdan keçirəcəyik.

- Ruslanın "Qəbələ"dəki çıxışını izləyirsiniz?
- Sizi aldatmaq istəmirəm: mənim icarədə olan futbolçuları izləmək üçün vaxtım yoxdur. İstənilən halda, yanvarda mən digər futbolçular kimi, Abışovu da sınaqdan keçirəcəyəm.

- Bəs onun "Rubin"in əsas heyətinə düşmək şansı var?
- İndi bu barədə danışmaq çətindir. Hər şeyə təlim-məşq toplanışı zamanı aydınlıq gələcək. Hazırda baxmalı olduğumuz xeyli futbolçu var. Özünü yaxşı tərəfdən göstərməyi bacaran hər kəs əsas heyətdə oynamaq şansı qazanacaq. Amma bu, qarşıdakı günlərin işidir.

- Abışov yenə ümidinizi doğrultmasa, onun Azərbaycanda qalmasını məsləhət görəcəksiniz, yoxsa Rusiya klublarında?
- Mənə elə gəlir ki, nəyinsə uğrunda mübarizə aparan komandalarda çıxış etmək daha yaxşıdır. Azərbaycan çempionatının səviyyəsi ilə o qədər də yaxşı tanış deyiləm. Klublarınızı yalnız Türkiyədəki təlim-məşq toplanışları zamanı görmüşəm. Onlar sürətlərinə və texnikalarına görə fərqlənirlər. Ruslana da məsləhət görərdim ki, Rusiyanın ortabab klublarında oynamaqdansa, Azərbaycan çempionatında medallar uğrunda mübarizə aparsın. Əsas sabit oynamaqdır.

- Azərbaycan yığmasında kimi tanıyırsınız?
- Cavadovu. Soyadını düz dedim? Rusiya yığmasına qol vurmuşdu. Yaxşı oyunçudur.

- Onu "Rubin"də görmək istəmirsiz?
- Yox, yox (gülür). Sadəcə, fikrimi bildirdim. Biz hələ kimləri götürəcəyimizə qərar verməmişik. Həm də Rusiya Futbol İttifaqının legioner limiti ilə əlaqədar qərarını gözləyirik.