Denis Silva: Vəziyyəti dəyişmək, zirvəni ələ keçirmək istəyirik

"Neftçi"nin müdafiəçisi Denis Silvanın azerisport.az saytına müsahibəsi

- "Qarabağ"la oyundakı heç-heçəni necə dəyərləndirərdiniz?
- Gərgin mübarizə oldu. Hər iki komanda qol vurmaq, qələbə qazanmaq istəyirdi. Mənə elə gəlir ki, maraqlı oyun alındı. Ümid edirəm ki, azarkeşlərin də xoşuna gəldi.

- İki xal itirdiyinizi düşünmürsüz?
- Bizə qələbə çox vacib idi. Çünki liderlə xal fərqini azaltmaq istəyirdik. Amma bu dəfə alınmadı. Qarşıda hələ çox oyunumuz var. Vəziyyəti dəyişmək və birinci pilləyə yüksəlmək istəyirik. Hər şey özümüzdən asılıdır.

- Əliyar Ağayevin idarəçiliyindən razı qaldınız?
- Bəli, o, öz işini yaxşı gördü.

- Reynaldonun yoxluğunda İnnosent Emeqaraya qarşı oynamaq nə dərəcədə asan oldu?
- Emeqaranın da öz oyun üslubu var. Amma Reynaldo meydanda daha çox çalışırdı. Emeqaranın arxasınca danışmaq istəməzdim. Sadəcə, mümkündü ki, həmin gün Emeqaranın günü deyildi.

- "Neftçi"nin heç-heçə seriyası nə vaxt başa çatacaq?
- Biz öz qol vəziyyətlərimizdən lazımınca yararlanmağa başlayanda. Bu, bizə çox mane olur. Çox çalışsaq da, hələ ki, alınmır.