Aleksandr Çertoqanov: 250-ci oyunumu keçirdiyimi mətbuatdan öyrəndim
"Sumqayıt"ın yarımmüdafiəçisi Aleksandr Çertoqanovun azerisport.az saytına müsahibəsi
- Azərbaycan çempionatındakı 250-cu oyununuzu necə qeyd etdiniz?
- Əlbəttə, şadam ki, yubiley oyunumda "Simurq" kimi çətin rəqib üzərində qələbə qazandıq. Amma bunu xüsusi qeyd etmək fikrim olmayıb. Bir neçə gün sonra "Neftçi" ilə oyun var, ona hazırlaşmalıyam.
- 11 ilə 250 oyun... Bu, çoxdur?
- Azərbaycanda çoxdandı oynayıram. Düzünü desəm, bu say mənim üçün xüsusi əhəmiyyət kəsb etmir. Heç xəbərim də yox idi. Hər şeyi mətbuatdan öyrəndim.
- Cəmi altı qol vurmusuz. Düşünmürsüz ki, 250 oyuna bu qədər qol azdır?
- Azdır (gülür). Belə alındı. Meydandakı mövqeyim bunu tələb edir.
- 11 il ərzində "Neftçi", "İnter", "Qəbələ", "Bakı", "Simurq" və "Sumqayıt"da oynamısız. Hansı klubda daha çox xoşbəxt olmusuz?
- Hərəsinin öz yeri vardı. Amma daha çox "Neftçi"dəki illərim yadımdadı. Bu komandada 4 il oynadım. Kollektiv də yaxşı idi. Amma çıxış etdiyim klubların heç birinə görə təəssüflənmirəm.
- Robert Prosineçkinin Azərbaycan yığmasının sükanı arxasına gətirilməsini necə qarşıladınız?
- Onu məşqçi kimi tanımıram. Amma pis olacağını düşünmürəm. Sevindirici haldır ki, o, Azərbaycanda yaşayacaq, çempionat oyunlarını mütəmadi izləyəcək. Hiss olunur ki, işləmək istəyən məşqçidir. Bu, hələ ki, kiçik də olsa, bir üstünlükdür.
- "Sumqayıt" tarixi ərzində ilk dəfə "Simurq"a qalib gəldi...
- Bu, çox vacib qələbədi. Eyni zamanda birinci dövrədəki məğlubiyyətin də qisasını almış olduq. Həmin oyunda 2:0 öndə olduğumuz halda, sonda uduzmuşduq. Elə ağır məğlubiyyətləri unutmaq çox çətin olar.
