Ernest Nfor: Qarabağa uduzmamaq bizim üçün vacib idi

"Neftçi"nin hücumçusu Ernest Nforun azerisport.az saytına müsahibəsi

- "Qarabağ"la oyun haqda nə deyə bilərsiz?
- Çox maraqlı oyun alındı. Hər iki komanda hücum futbolu sərgiləsə də, qol vurmaq mümkün olmadı.

- Bəs oyunun sonları niyə sönük keçdi?
- Bu, oyuna necə baxmaqdan irəli gəlir. Futbolçular üçün hər şey o qədər də pis alınmadı. Çünki heç kim qol buraxmaq istəmirdi. Bir qol hər şeyi həll edə bilərdi.

- Bir neçə epizodda Bədavi Hüseynova qarşı çox kobud oynadınız və nəticədə Rəşad Sadıqov sizi tənqid etdi...
- Bəs siz "Qarabağ"ın futbolçularının mənə neçə dəfə toxunduğunu görmədiniz? Neçə dəfə təkrarlandığını hesablamamısız? Bu, futboldu, belə hallar olur.

- "Neftçi"nin durumu sizi narahat etmir?
- Bu, bizim üçün problem deyil. Bu oyunda "Qarabağ"a uduzmamaq vacib idi. Qarşıda hələ çox oyunumuz var. Mənə elə gəlir ki, biz zaman keçdikcə daha yaxşı oynamağa nail olacağıq və nəticələrimiz də yaxşılaşacaq.

- Ruslan Qurbanov, Nikolas Kanales və sizin aranızda anlaşma səviyyəsi elə də yaxşı deyil. Bunu nə ilə izah edə bilərsiz?
- Hər şey oyundan asılıdı. Biz baş məşqçinin növbəti oyuna hansı taktika seçəcəyini bilmirik. Bu dəfə Ruslanı seçmişdi. Şanslar olsa da, qol vurmağı bacarmadıq.