Qurban Qurbanov: İnterlə oyunadək o, özünə gələcək

"Qarabağ"ın baş məşqçisi Qurban Qurbanov Topaz Premyer Liqasının 15-ci turu çərçivəsində "Neftçi"yə qarşı keçirilmiş oyundan sonra fikirlərini açıqlayıb. Azerisport.az xəbər verir ki, o, qolsuz heç-heçə ilə bağlı öncə bunları söyləyib:

"Yaxşı oyun idi. Uşaqlardan razı qaldım. Sərbəst oynadılar. Bir xal qazana bildik. Qarşıda bizi İtaliya "İnter"i ilə oyun gözləyir. Artıq futbolçularımızı həmin oyuna hazırlamalıyıq. "Neftçi"yə uğurlar arzulayıram".

Ağdamlıların çalışdırıcısı zədəli futbolçularının sayının daha da artmasından ehtiyatlandıqlarını gizlətməyib: "Amma bu, futboldu. Əgər onların zədələnməsindən qorxsaydıq, heç birini meydana buraxmazdıq".

Qurbanov Reynaldonun yoxluğundan və qol epizodlarından lazımınca yararlana bilməmələrindən də danışıb: "Komandamız yalnız Reynaldodan asılı deyil. Düzdü, qol vəziyyətlərimiz olur. Sadəcə, onlardan yararlana bilmirik. Bəzən elə oyunlar olur ki, top qapıya girmək istəmir".

Baş məşqçi "Neftçi" ilə oyuna qələbə üçün çıxdıqlarını bəyan edib: "Biz heç-heçəyə oynamırdıq. Meydana qələbə üçün çıxmışdıq. Sadəcə, səbli oynamağa çalışırdıq. Futbolda bu, çox vacibdi".

Qurbanov Bədavi Hüseynovun zədəsindən də danışıb: "Onun ayağında şiş var. Amma ümid edirəm ki, ciddi bir şeyi yoxdu və Milan "İnter"i ilə oyuna qədər özünə gələcək".