Ramaldanov: İtkilərin bizə nə dərəcədə pis təsir etdiyini Qəbələ ilə oyun göstərəcək
"Xəzər Lənkəran"ın müdafiəçisi Rasim Ramaldanovun azerisport.az saytına müsahibəsi
- "Qəbələ" ilə oyundan nə gözləyirsiz?
- Əlbəttə, Lənkəranda oynamağımız daha yaxşı olardı. Orada tam fərqli atmosfer olur. Amma buradakı oyunlarımıza da azarkeşlərimiz gəlir, bizi yalnız buramırlar.
- "Neftçi" ilə oyunda aldığınız zədədən sonra özünüzü necə hiss edirsiz?
- Elə də ağır zədəm yox idi. Artıq sağalmışam.
- Həmin oyunda Mirhüseyn Seyidovun son saniyələrdə vurduğu qol komandanıza çoxmu təsir etdi?
- Biz artıq həmin oyunu unutmuşuq və tam olaraq "Qəbələ" ilə qarşılaşmaya köklənmişik. Seyidovun qolu möhtəşəm alındı. Həmin zərbəni dəf etmək çox çətin idi.
- Əfran İsmayılovla Rəşad Sadiqovun yoxluğu "Qəbələ" ilə oyunda təsirini göstərə bilər?
- Bunu ancaq oyun göstərəcək. Amma bizə hələ həmin oyundan öncə demişdilər ki, təxribata uymayın. Təəssüf ki, hərdən özünü saxlaya bilmədiyin anlar da olur. İstənilən halda "Qəbələ" ilə oyunda maksimum güc qoyub qələbə qazanmalıyıq.
