Topaz Premyer Liqasında derbilər turu

Bu gün Topaz Premyer Liqasında 15-ci turun oyunları keçiriləcək. Azerisport.az xəbər verir ki, turun bütün qarşılaşmaları eyni gündə baş tutacaq.

Turun açılış və mərkəzi oyunu “Qarabağ” və “Neftçi” arasında olacaq. Azərbaycan çempionatlarında ən çox qarşılaşan rəqiblər 58-ci dəfə üz-üzə gələcək. Minimal üstünlüyə malik “Qarabağ” (18 qələbəsi var) son 5 oyunda rəqibinə uduzmayıb. 22 dəfə sülh bağlayan tərəflərin duellərində "Neftçi" 17 qalibiyyət əldə edib. Komandaların son 4 görüşündə hər iki komanda qol sevinci yaşayıb. Bütövlükdə isə hər iki komanda geridə qalan oyunlarda eyni sayda (55) qol vurub. İlk dövrədə keçirilən oyunda "Qarabağ" rəqibinə 3:1 hesabıyla qalib gəlmişdi. Hazırda birinci pillədə qərarlaşan və əsas izləyicisi "Neftçi"dən 5 xal öndə olan son çempion zirvədəki mövqeyini daha da möhkəmləndirmək üçün yenə qələbə qazanmağa çalışacaq. Ən azı aradakı fərqi qorumaq üçün isə heç-heçə yetərli olacaq. Heyətində ciddi itkiləri olan, qarşıdakı Avropa Liqasının qrup mərhələsi çərçivəsindəki Milan "İnter"i ilə oyunu da düşünmək məcburiyyətində də qalan Qurban Qurbanovun komandası uduzmayacağı halda düşərgədəki ab-havanın da yaxşı qalmasına nail olacaq. "Neftçi" isə rəqibin heyətlə bağlı problemlərindən maksimum yararlanıb, liderlə aradakı xal fərqini azaltmağa cəhd göstərəcək.

Günün növbəti oyununda “Sumqayıt” “Simurq”u qəbul edəcək. 12-ci duel öncəsi “Simurq” aşkar üstünlüyə malikdir. İndiyədək qələbə qazanmayan “Sumqayıt” cəmi 1 xal qazanıb. Zaqatala təmsilçisi bütün matçlarda rəqib qapısına qol vurub. Bu komandanın 10 qələbəsi var. Top fərqində də Zaqatala klubu 20:6 öndədir. Sumqayıtlılar indi ilk dəfə bu rəqibini məğlub yola salmağa çalışacaq. Aqil Məmmədovun komandası bunu bacarsa, həm tarixi sindroma son qoymuş olacaq, həm də ilk dövrədə Zaqatalada qeydə alınan 2:3 hesablı yenilgini unutduracaq.

Cari mövsümdəki iddiaları ilə nəticələri üst-üstə düşməyən iki komanda - “Xəzər Lənkəran”la “Qəbələ” bu tur bir-biri ilə qarşılaşacaq. Lənkəran təmsilçisi əvvəlki 23 oyunda böyük üstünlüyə malikdir - 12 qələbə. 5 oyunda heç-heçə qeydə alınıbsa, 5 görüşdə də "Xəzər Lənkəran" 3 xalı bayram edib. Son 4 matçda uduzmayan, ardıcıl 3 oyundur meydanı qolsuz tərk etməyən cənublular indiyədək yalnız 1 ev görüşündə məğlub olub. Top fərqində də "ağ-yaşıllar" üstündürlər - 32:20. Lənkəran şəhər stadionundakı təmir işləri ilə əlaqədar "Xəzər Lənkəran" "Neftçi"nin ardından "Qəbələ"ni də Bakıda qəbul edəcək. Bu, müəyyən mənada qonaqlara sərf edəcək. Xatırladaq ki, ilk dövrədə Qəbələdə keçirilmiş oyunda qalib müəyyənləşməmişdi - 1:1.

Tura paytaxt derbisi ilə yekun vurulacaq. Qapanış matçında "İnter” AZAL-la münasibətlərinə aydınlıq gətirəcək. 24-cü paytaxt derbisi ərəfəsində “İnter” üstünlüyə malikdir - 7 qələbə. Son 5 qarşılaşmada onlar meydanı qolsuz tərk etməyib. AZAL isə son 4 görüşdə cəmi 1 xal qazana bilib. Bu komanda 5 dəfə qələbə qazanıbsa, 11 görüşdə də heç-heçə qeydə alınıb. Top fərqində "bankirlər"in minimal fərqli üstünlüyü var - 20:19. Bu komandalar arasında ilk dövrədəki oyunda da sülh qeydə alınmışdı - 1:1. Tərlan Əhmədovun komandası yüksək şansa malik olmadığı paytaxt derbisində sürpriz nəticəyə imza atmağa çalışacaq. "İnter" isə liderlər qrupundakı mövqeyini yaxşılaşdırmaq üçün mütləq qələbə qazanmağa borcludur.

Topaz Premyer Liqası
15-ci tur
7 dekabr

15:15. “Qarabağ” – “Neftçi”
Hakimlər: Əliyar Ağayev, Zeynal Zeynalov, Namiq Hüseynov, Ramil Diniyev.
AFFA nümayəndəsi: Abbas Hüseynov.
Hakim-inspektor: Məlik Həsənov.
Bakı. Tofiq Bəhramov adına Respublika stadionu.

16:00. “Sumqayıt” – “Simurq”
Hakimlər: İnqilab Məmmədov, Elman Musayev, Azər Əsgərov, Ramil Əhmədov.
AFFA nümayəndəsi: Adil Nadirov.
Hakim-inspektor: Füzuli Nəcəfov.
Sumqayıt. “Kapital Bank Arena”.

17:00. “Xəzər Lənkəran” – “Qəbələ”
Hakimlər: Elvin Əsgərov, Elşən Acalov, Mübariz Haşımov, Vüsal Əliyev.
AFFA nümayəndəsi: Rauf Əmirov.
Hakim-inspektor: Əli Hüseynov.
Bakı. “Bayıl Arena”.

17:15. “İnter” – AZAL
Hakimlər: Rəhim Həsənov, Yaşar Abbasov, Nihad Əliyev, Fariz Yusifov.
AFFA nümayəndəsi: Telman Əzizov.
Hakim-inspektor: Murad Məmmədov.
Bakı. “İnter Arena”.
 

Bombardirlər:
8 - Mikel Alvaro (“İnter”).
6 - Nurlan Novruzov ("Bakı").
5 - Məhəmməd Qurbanov (“Sumqayıt”), Draqan Çeran ("Simurq").
4 - Rəşad Abdullayev (AZAL), Cavid Hüseynov ("Qəbələ"), İnnosent Emeqara ("Qarabağ"), Leroy Corc ("Qarabağ").