Nikolas Kanales: Neftçi Qarabağla oyun öncəsi üstünlüyə malikdi

"Neftçi"nin hücumçusu Nikolas Kanalesin azerisport.az saytına müsahibəsi

- "Qaradağ Lökbatan" üzərindəki qələbə ilə bağlı nə deyə bilərsiz?
- Belə komandalara qarşı oynamaq çox çətindi. Çünki onlar bizimlə oyuna xüsusi köklənirlər. Erkən qol vurmaq çox vacib idi. Şadam ki, istədiyimiz nəticəni qazana bildik.

- Qarşıda "Qarabağ"la oyun var...
- Bu, cari mövsümdə keçirdiyimiz oyunlar arasındakı ən vacib görüşdü. Qələbə qazanacağımız halda turnir cədvəlindəki vəziyyətimizi xeyli yaxşılaşdırmış olacağıq.

- Ağdamlılar hazırda çox yaxşı formadadılar. Onlarla bacaracaqsız?
- Bizə sərf edən əsas məqam rəqibin Avropa Liqasının qrup mərhələsi çərçivəsində Milan "İnter"i ilə oyuna hazırlaşmasıdı. Fikrimcə, onlar bizimlə oyuna Avroliqa görüşünə hazırlıq gözü ilə baxacaqlar. Biz isə bundan maksimum yararlana bilərik.

- Birinci divizion klubuna da qol vura bilmədiniz. Bəs ağdamlılarla oyunda sizdən nə gözləyək?
- Bu, məni o qədər də narahat etmir. Karyeram ərzində az qol vurmamışam. Bundan sonra da qollar vurmağa davam edəcəm. Qarşıdakı oyunda da komandama kömək etməyə çalışacam. Son oyunda da qol vura bilmədim. Amma əsas odu ki, komandamız ölkə kubokunun 1/4 finalına vəsiqə qazandıq.

- "Qaradağ Lökbatan"la oyunda Arif Əsədov ilk dəqiqələrdən Ernest Nfora şans vermişdi. "Qarabağ"la görüşdə də belə olacaq?
- Bu, ilk belə oyun idi. Növbəti oyunda da oxşar qərar qəbul etsələr, əleyhinə olmayacağam.