Ramil Şeydayev: Seçim etsəm, Azərbaycanı yox, Rusiya yığmasını seçəcəm

Rusiyanın "Zenit" klubunun və gənclərdən ibarət yığmasının hücumçusu Ramil Şeydayevin azerisport.az saytına müsahibəsi

- "Zenit"dəki durumunuzdan razısız?
- Əlbəttə.

- Komandanın baş məşqçisi Andre Villaş-Boaşla söhbətiniz olub?
- O, mənə böyük ümidlər bəsləyir. Amma şəxsi söhbətimiz olmayıb.

- Bəs hardan belə bir nəticəyə gəlmisiz ki, o, sizə ümidlidi?
- Çünki son zamanlar o, əsas komandada mənə oynamaq şansı verir.

- "Mordoviya" ilə oyunda Rusiya Premyer Liqasında debüt etdiniz. Necə hisslər keçirdiniz?
- Həmin oyunda meydana çıxacağımı bilirdim. Amma oyunun gedişində elə dəyişikliklər oldu ki, meydana buraxılmayacağımı düşünməyə başlamışdım. Lakin Villaş-Boaş məni çağırıb, məşq etməyimi istədi. Yaxşı hisslər keçirdim.

- Azərbaycandan debütünüz münasibətilə təbrik aldınız?
- Xeyr, heç kim zəng etməmişdi.

- AFFA-dan Azərbaycan yığmasında oynamaq təklifi almısız?
- Əvvəllər almışdım. İndi elə bir təklif yoxdu.

- Rusiya yığmasındakı durumunuz necədi?
- Hər şey qaydasındadı. Çalışıram ki, gənclərdən ibarət yığmada özümü göstərim.

- Azərbaycan yığmasında oynamaq təklifi alsaz, razılaşacaqsız?
- Belə deyim: əgər Rusiya yığmasında da oynamaq şansım varsa, bu variantı seçərəm.

- Legioner limitinə görə elə seçim edirsiz?
- Azərbaycan yığmasında oynamağa başlasam, Rusiyada legioner sayılacağam. Onda öz klubumda əsas heyətə düşməyim çətinləşəcək.

- Bəs valideynləriniz bu barədə nə deyirlər?
- Heç nə. Azərbaycana istirahətə getməyi çox sevirəm. Qohumlarımıza baş çəkirəm. Amma Azərbaycan yığmasından mənimlə heç kim əlaqə saxlamır.

- "Zenit"də sizin harada oynamağınızı istəyirlər?
- Dəqiq heç nə bilmirəm. Klubumda mənimlə bu barədə heç kim danışmır.