Prosineçki: Dağıdıcılığı yox, yaradıcılığı sevirəm
Azərbaycan yığmasının yeni baş məşqçisi Robert Prosineçki jurnalistlərin suallarını cavablayıb. Azerisport.az xəbər verir ki, o, öncə bunları söyləyib:
- Hamınızı salamlayıram. 10 gündü Bakıdayam. Şəhərdən razıyam, insanları qonaqpərvərdi. İdman planında əlimizin altında material var. Onunla işləmək olar. Rövnəq Abdullayev dedi ki, Bakıda yaşayacağam. Bunu mən də istəyirəm. Mətbuata həmişə açıq olmuşam və dəyişməyi düşünmürəm.
- Köməkçiləriniz kim olacaq?
- Yerli köməkçilərimin kim olacağını demək istəmirəm. Onu deyə bilərəm ki, aşağı yaş qruplarından ibarət komandaların da çıxışını izləyəcəm. İstəyirəm ki, bütün yaş qrupları üzrə yığmalar əsas millinin oyun üslubunda çıxış etsinlər. Hücum etməyimizi, müdafiədə oturmamağımızı istəyirəm. Mən dağıdıcılığı yox, yaradıcılığı sevirəm.
- Məşqçilər Komitəsi ilə də işbirliyiniz olacaq?
- Bəli, mən onlarla tez-tez əlaqə saxlayacağam. Klubların Antalyadakı təlim-məşq toplanışına getməyi planlaşdırıram. İlk toplanışımız fevralda olacq. Ayın sonunda mümkündü ki, bir yoxlama oyunu da keçirək. Bilirəm ki, Berti Foqts da belə toplanışlar keçirirmiş. Deməli, buna ehtiyac var. Növbəti toplanışlarımızın nə qədər davam edəcəyini deyə bilmərəm. Amma fevral toplanışımızın 6-7 gün sürəcəyi dəqiqdi.
- Təyinatınıza qədər Azərbaycan futbolu barədə nəsə bilirdiz?
- Bəli, yığmanızı tanıyırdım.
- Yığmanın seçmə mərhələdəki şanslarını necə qiymətləndirə bilərsiz?
- Ola bilər ki, İtaliya və Xorvatiyaya qalib gəlməyək. Amma daha yaxşı oyun sərgiləyə bilərik. Mən optimistəm və komandanın potensialına güvənirəm. Ruhdan düşmək olmaz. Toparlanmalı və mart ayında Maltaya qalib gəlməliyik.
- Deyilənə görə, heyətdə gəncləşdirmə siyasəti aparacaqsız?
- Bəli. Amma qəsdən kimisə komandadan qovmaq haqda düşünmürük. Hər şey futbolçuların özündən asılıdı. Ümid edirəm ki, futbolçularımız daha güclü liqalarda çıxış edəcəklər.
