Abdullayev: Qurbanov milliyə gəlsəydi, həm onu, həm də Qarabağı itirərdik

AFFA prezidenti Rövnəq Abdullayev İcraiyyə Komitəsinin iclasından sonra jurnalistlərin suallarını cavablandırıb. Azerisport.az sizi həmin müsahibə ilə tanış edir.

- İK üzvləri Robert Prosineçkiyə necə səs verdi?
- Yekdilliklə. Əminəm ki, Prosineçkiyə yığmamıza yeni stil gətirəcək. Çünki o, yığmamızı çalışdıran ilk keçmiş hücumçu olacaq.

- Onun qarşısında hansı hədəf qoyulub?
- Prosineçkinin qarşısına yığmamızı AÇ-2020-yə hazırlamaq vəzifəsi qoyulub. Komanda həmin turnirin final mərhələsində oynamalıdı. Bunun üçün gəncləşdirmə siyasəti aparılmalıdı.

- Xorvatın maaşı necə olacaq?
- İlinə 1 200 000 avro. Bu, onunla köməkçiləri arasında bölüşdürüləcək. İki köməkçisi də yerli olacaq.

- U-21-in baş məşqçi postu ilə bağlı nə qərar qəbul etdiniz?
- Bu barədə hələ qərar yoxdu. Namizədləri diqqətlə gözdən keçirəcəyik.

- Klublar Komitəsi nəyə xidmət edəcək?
- Bu komitə klubların ideyalarını birbaşa AFFA-ya təqdim etmək imkanı yaradacaq. Daha PFL vasitəsilə yox. Ramin Musayev PFL-dən gedəcəkmi? Onun təqaüdə çıxmasına hələ çox var.

- Qurban Qurbanovu niyə yığmaya dəvət etmədiz?
- O, çox ağıllı məşqçidi. Vaxtilə onu "Neftçi"yə məhz mən gətirmişdim. Əgər o, millinin baş məşqçisi olsaydı, onu, "Qarabağ"ı itirəcəyimizdən qorxdum. Klubunda uğurlu fəaliyyət göstərir. Qoy davam etsin.

- "Araz Naxçıvan"ın çempionatdan çıxması ilə bağlı nə deyə bilərsiz?
- Onların problemləri vardı. Buna görə də çempionatdan çıxdılar.

- Neftin qiymətinin aşağı düşməsi AFFA-nın büdcəsinə təsir göstərir?
- Xeyr. Heç bir halda.