Vüqar Nadirov: Robert Prosineçkinin oyunlarımıza baxması mənə əlavə stimul verir

"Qarabağ"ın hücumçusu Vüqar Nadirovun azerisport.az saytına müsahibəsi

- Ötən həftə siz "Qarabağ"ın Avropa Liqasının qrup mərhələsi çərçivəsində qol vuran ilk futbolçusu oldunuz...
- Bu, təkcə mənim yox, bütün komandanın xidmətidi. Bu qol kollektiv çıxışımızın nəticəsində vuruldu, mənim fərdi keyfiyyətlərim sayəsində yox.

- Qoldan sonra göz yaşlarınızı saxlaya bilmədiniz. Buna səbəb nə oldu?
- Mənim atam məhz Ağdamda şəhid olub. Biz də hazırda bu şəhəri təmsil edirik. Nədənsə məhz bunlar yadıma düşdü.

- "Simurq"la oyuna ehtiyatda başladınız. Buna nə səbəb oldu?
- Baş məşqçi elə qərar verdi. Nə vaxt, harada deyirlərsə, orada da oynayıram.

- "Simurq" - "Qarabağ" matçında bu qədər qolun vurulacağını (3:2) çox az adam gözləyirdi...
- Biz bunu gözləyirdik. "Simurq" yaxşı komandadı. Rəqibin azarkeş dəstəyi də var idi. Əsas odu ki, qələbə qazandıq. Bu üç xal bizim üçün çox vacib idi.

- Bu oyunda da qol vurmağı çox istədiyiniz hiss olunurdu...
- Hə, şansım da oldu. Amma top dirəkdən qayıtdı. Təəssüf ki, hədəfə düşə bilmədim.

- Yenidən yığmaya qayıtmağı düşünürsüz?
- Əlbəttə. Robert Prosineçkinin oyunlarımıza baxması mənə əlavə stimul verir.