Matiya Şpiçiç: Əminəm ki, Prosineçki Foqtsdan daha çox seviləcək

"İnter"in xorvatiyalı yarımmüdafiəçisi Matiya Şpiçiçin azerisport.az saytına müsahibəsi

- Robert Prosineçki yığmamızı çalışdırmağa çox yaxındı. Bunu necə qarşıladız?
- AFFA düzgün seçim edib. Amma o, yığmaya belə bir çətin vaxtda dəvət olunduğuna görə, vaxt verilməlidi. Mən onu həm yaxşı insan, həm də məşqçi kimi tanıyıram.

- O, bizim futbola nə verə biləcək?
- Bunu zaman göstərəcək. Prosineçkinin potensialına şübhə etmirəm.

- Bu məşqçi startda 4 ardıcıl məğlubiyyətlə üzləşən komandanı bu durumdan çıxarmağa hazırdı?
- Bu seçmə mərhələdə nəyəsə nail olmaq artıq çətin görünür. Amma düzgün iş qurulacağı halda vəziyyəti dəyişmək olar. Məsələn, ardıcıl üç oyun ardıcıl qələbə qazanmaqla nəsə etmək mümkündü.

- Prosineçkinin komandası necə futbol oynayacaq?
- O, hücum futbolunu sevir. Fikrimcə, Prosineçki ilk növbədə azərbaycanlı futbolçuların imkanlarını dəyərləndirəcək. Taktikasını da əlindəki materiala uyğun qurmağa çalışacaq.

- Bu xəbəri Xorvatiya futbol ictimaiyyəti necə qarşıladı?
- Normal. Onun Bosniya və Herseqovina, Bolqarıstan yığmalarını da çalışdırmaq variantı var idi. Amma gördüyünüz kimi, seçimini Azərbaycanın lehinə etdi. Bunun niyəsini bilmirəm. Öz şəxsi işidi.

- Geridə qalan altı il ərzində Berti Foqtsu tənqid etməyən qalmadı. Onun mətbuatla münasibətləri də ideal deyildi. Prosineçki ilə bağlı vəziyyət necə olacaq?
- Bu, onun işidi və hər şeyə hazır olmalıdı. Nəticə olmayacaqsa, tənqidlər mütləq olacaq. Mənim tanıdığımı Prosineçki futbolçularla da, mətbuatla da dil tapa biləcək. Əminəm ki, o, Foqtsdan daha çox seviləcək.