Subaşiç: Düşünmürəm ki, Prosineçki serb olduğuma görə məni milliyə çağırmasın

Futbol üzrə Azərbaycan yığmasının sabiq forvardı, Türkiyənin "Manisaspor" klubunun hücumçusu Branimir Subaşiçin azerisport.az saytına müsahibəsi

- "Manisaspor"dakı işləriniz necə gedir?
- Normaldı. Burada hər kəs mənə yaxşı davranır. Bir oyunda hətta komandanı kapitan kimi meydana çıxarmışam.

- Pul problemləri həll olundu?
- Hələ var. Əgər belə davam etsə, nəsə düşünmək lazım gələcək.

- Başqa klublardan təkliflər var?
- Bəli. İki Türkiyə klubu məni heyətində görmək istəyir. Sadəcə, tələsmək istəmirəm. Çünki bura yenicə gəlmişəm.

- Azərbaycandan dəvət yoxdu?
- İndi yox. Yayda var idi.

- Azərbaycan yığması böyük ehtimalla xorvatiyalı Robert Prosineçkiyə tapşırılacaq. Bundan xəbəriniz var?
- Bəli. Onu şəxsən tanımıram. Amma futbolçu kimi çox məşhur olub. Gözəl pleymeyker idi.

- Xorvatlarla serblər arasında münasibətlər heç vaxt yaxşı olmayıb. Düşünmürsüz ki, bu üzdən o, sizi yığmaya çağırmayacaqlar?
- Bəli, ola bilər ki, o, kimisə sevməsin. Amma mənim xorvatlarla, Xorvatiya ilə heç bir problemim yoxdu. Müharibə 20 il öncə bitib. Hər şey geridə qalıb. Dostlarım arasında çoxlu xorvat var. Düşünmürəm ki, "Srvena Zvezda"nı çalışdırmış Prosineçki kimi peşəkar belə şeylərə fikir versin.

- Millimizə qayıtmaq haqda düşünmürsüz?
- Əlbəttə, bu barədə daim düşünürəm. Mən də bunun üçün çalışıram.