Topaz Premyer Liqasında 14-cü tur həyacanı

Bu gün və sabah Topaz Premyer Liqasında 14-cü turun oyunları keçiriləcək. Azerisport.az xəbər verir ki, 2 gün davam edəcək turun ilk 3 oyunu Bakıda baş tutacaq.

Tura paytaxt derbisi ilə start veriləcək. Açılış matçında "Bakı" öz meydanında "İnter"i qəbul edəcək. Paytaxt derbisinin iştirakçıları yubiley matçına çıxacaq. 40-cı duel öncəsi “İnter”in üstünlüyü diqqət çəkir. Bu komanda 17 dəfə qələbə qazanıb. 13 görüşdə  "zolaqlılar" 3 xala sevindiyi halda, 9 qarşılaşmada da qalib müəyyənləşməyib. Son 11 matçda qələbə qazanmayan “Bakı” ardıcıl 2 görüşdə böyükhesablı məğlubiyyət alıb. Elə ilk dövrədəki 0:7 hesablı darmadağını xatırlatmaq yerərlidi. "Bankirlər"in top fərqində də böyük üstünlüyü var - 42:31. "İnter"i bu oyunda da aşkar favorit görünür. Amma zəif heyətə malik olmasına baxmayaraq, iddialılara qarşı ciddi müqavimət göstərməyi bacaran "zolaqlılar"ın sürprizə imza atması da istisna deyil.

Növbəti görüşdə AZAL-la “Sumqayıt” üz-üzə gələcək. Autsayderlər qrupunda qərarlaşan komandalar 14-cü dəfə münasibətlərini aydınlaşdıracaq. Əvvəlki görüşlərdə üstünlüyə malik olan AZAL 5 dəfə qələbəyə sevinib. Eyni sayda heç-heçə qeydə alındığı halda 3 görüşdə də sumqayıtlılar 3 xala seviniblər. AZAL son 3 oyunda meydanı qolsuz tərk etmir. Sumqayıtın eyniadlı təmsilçisi isə səfərdə rəqibini məğlub edə bilməyib. İlk dövrədəki oyunda da "təyyarəçilər" 1:0 hesabıyla üstün olmuşdular. Autsayderlər qrupunu tərk etmək üçün hər iki komandaya qələbə qazanmaq çox lazımdı.

Daha bir oyun “Neftçi” və “Qəbələ” arasında baş tutacaq. Əvvəlki 25 oyunda üstünlük “Neftçi”nin tərəfində olsa da, son iki matçda bakılılar qalib gəlməyib. 12 qələbəsi olan paytaxt təmsilçisi 6 görüşdə heç-heçəyə razılaşdığı halda, daha 7 qarşılaşmada da məğlubiyyətlə üzləşiblər. "Ağ-qaralar” son 4 ev matçını qolsuz tərk etməyib. Maraqlıdır ki, Bakıdakı son 4 oyunda 3 qol vurulub, bunların üçündə eyni hesab qeydə alınıb. İlk dövrədəki oyunda qolsuz heç-heçənin qeydə alındığını da vurğulayaq. Bütövükdə, top fərqi də bakılıların xeyrinədi - 35:23.

Turun qapanış matçında “Simurq” son çempion “Qarabağ”la üz-üzə gələcək. Eyni sayda (6) qələbə qazanan rəqiblərin duellərində Zaqatala klubu top fərqində öndədir - 15-13. Daha 9 görüşdə isə heç-heçə qeydə alınıb. Bu komandaların son 7 duelində 1-dən artıq qol vurulmur. “Qarabağ” isə son 4 səfər matçında qol vura bilməyib. “Simurq”un ev oyunlarında 7 ildir 1-dən artıq qol qeydə alınmır. İlk dövrədəki oyunda "Qarabağ" 1:0 hesabıyla üstün olmuşdu.

Topaz Premyer Liqası
14-cü tur
29 noyabr (şənbə)

14:00. Bakı - İnter
Hakimlər: Elvin Əsgərov, Rahil Ramazanov, Namiq Hüseynov, Vüsal Əliyev.
AFFA nümayəndəsi: Nüvər Xasıyev.
Hakim-inspektor: Xaqani Məmmədov.
“Bakı” FK-nın təlim-məşq bazasının stadionu.

15:00. AZAL - Sumqayıt
Hakimlər: Fariz Yusifov, Azər Əsgərov, Cavanşir Yusifov, Orxan Məmmədov.
AFFA nümayəndəsi: Vaqif Davudov.
Hakim-inspektor: Akif Məmmədov.
Bakı. “AZAL Arena”.

17:00. Neftçi - Qəbələ
Hakimlər:  İnqilab Məmmədov, Mehman Mahmudov, Nahid Əliyev, Mahir Məmmədov.
AFFA nümayəndəsi: Elbrus Abbasov.
Hakim-inspektor: Rövşən Əhmədov.
Bakı. “Bakcell Arena”.

30 noyabr (bazar)

17:00. Simurq - Qarabağ
Hakimlər: Rəhim Həsənov, Munis Abdullayev, Mübariz Haşımov, Teymur Fərhadov.
AFFA nümayəndəsi: Mübariz Hüseynov.
Hakim-inspektor: Fazil Mürşüdov.
Zaqatala şəhər stadionu.
 

Bombardirlər:
7 - Mikel Alvaro (İnter)
6 - Nurlan Novruzov (Bakı).
5 - Məhəmməd Qurbanov (Sumqayıt).
4 - Draqan Çeran (Simurq), Cavid Hüseynov (Qəbələ), İnnosent Emeqara (Qarabağ).