"Braziliyalıların yoxluğu Qarabağın oyununa təsir göstərə bilər"
"Qarabağ"ın uşaq futbolu üzrə idman direktoru Con van Loen azerisport.az saytının suallarını cavablandırıb.
- "Qarabağ"ın "Sent-Etyen"lə oyunundan nə gözləyirsiz?
- Ümid edirəm ki, komandamız bu oyunda yaxşı çıxış edə biləcək. Ən azından İtaliya "İnter"i ilə səfər oyunu bunu deməyə əsas verir.
- Çumbinyo, Dias və Reynaldonun yoxluğu komandaya təsir edə bilərmi?
- Ola bilər. Xüsusilə də Reynaldonun. Onun öz üstünlükləri var. Amma komanda 25 futbolçudan ibarətdi və hər kəs digərini əvəz edə biləcək gücdədi.
- Reynaldoya əvəzləyici var?
- Fikrimcə, Qurban Qurbanov nəyi necə edəcəyini yaxşı bilir.
- Onun əvvəlki formasından uzaq qalmasını nə ilə izah edərdiz?
- O, braziliyalıdı. Onlarda belə hallar olur. Amma Reynaldo fantastik futbolçudu.
- Həmyerliniz Leroy Corcun oyunu xoşunuza gəlir?
- Əlbəttə. O, çox yaxşı futbolçudu. Yeri gəlmişkən, o, mənim "Utrext"də çalışdığım vaxt oyunçum olub.
- "Qarabağ"ın Premyer Liqadakı çempionluq şanslarını necə qiymətləndirə bilərsiz?
- "Qarabağ" Azərbaycanın ən yaxşı komandasıdı. Bunu öz oyunu ilə də göstərir. Titulumuzu qorumalıyıq.
- Robert Prosineçkinin Azərbaycan yığmasının sükanı arxasına keçməsi gözlənilir. Siz bu təyinata necə baxırsız?
- Mən onu məşqçi kimi görməmişəm. Xüsusi məşqçi təcrübəsi də yoxdu. Heç nə deyə bilmərəm. Futbolçu kimi bir neçə dəfə qarşılaşmışıq. Gözəl futbolçu olub. Məşqçi karyerasında da uğurlar arzulayıram.
- Bu yaxınlarda "Breda"dan təklif alsaz da, imtina etmisiz. Niyə?
- Şərtləri məni qane etmədi. Onlar mənim komandaya mövsümün sonunadək başçılıq etməyimi istəyirdilər. Mən isə başqa təklif irəli sürdüm - bu mövsüm + daha bir mövsüm. Dekabrın 5-də AFFA-nın baş katibi Elxan Məmmədovla söhbətim olacaq. "Qarabağ"da qalıb-qalmayacağıma onda aydınlıq gələcək.
- Artıq 8 aydı "Qarabağ"dasız. Geridə qalan dövrdə nə dəyişib, nə çatışmır?
- Biz ilk növbədə uşaqların futbola baxışını dəyişdik. Bütün yaş qruplarında komandalarımız var. Bu, böyük işdi. Bizim tamamilə fərqli futbol fəlsəfəmiz var. "Qarabağ"da indi baza çatışmır. Kiçik meydançamız var, orada məşq edirik. Əgər bizim öz otelimiz, meydanlarımız olsa, regionlardakı uşaqları da komandamıza cəlb edə bilərik.
- Siz Tahir Gözəllə bu barədə söhbət etmisiz?
- Bəli. Sadəcə, Bakıda belə bir bazanın yaradılması üçün yer yoxdu.
