Aslan Kərimov: Qarabağ Sent-Etyenlə qollu heç-heçəyə imza atacaq
Futbol üzrə Azərbaycan yığmasının məşqçisi Aslan Kərimov səfərdə Fransa "Sent-Etyen"i ilə qarşılaşacaq "Qarabağ"la birgə səfərə yollanıb. O, azerisport.az saytına açıqlamasında bu oyunla bağlı fikirlərini açıqlayıb.
- Artıq iki gündü "Qarabağ"ın düşərgəsindəsiz. "Sent-Etyen"lə oyun öncəsi komandadakı atmosfer necədi?
- Gördüklərim xoş təəssürat oyadır. Uşaqlar zarafatlaşırlar, gülürlər. Bütövlükdə xoş atmosfer var. Məşqlərə tam konsentrasiya olublar.
- Qurban Qurbanov itkilərdən danışmağı xoşlamasa da, mətbuat konfransında bu durumun az qala problem olduğunu deyəcəkdi...
- Zədəli futbolçular komandada aparıcı rol oynayanlardı. Çumbinyo, Dias, Reynaldo komandanın əsas heyət üzvləridi. Baş məşqçinin onları kimlərlə əvəzləyəcəyini bilmirəm. Amma mənim üçün bu, doğrudan da böyük problemdi. Onlara layiqli əvəzləyici tapmaq çətin olacaq. İstər istəməz onların yoxluğu özünü göstərə bilər.
- Sizcə, "Qarabağ"ın bu oyunda uğur qazanmasına nə mane ola bilər?
- Çoxlu amillər saymaq olar. "Sent-Etyen" öz meydanında oynayacaq. Güman ki, Bakıdakı oyundan fərqli bu dəfə daha güclü heyəti meydana buraxacaqlar. Zədəlilərimizin olması da şübhəsiz ki, təsirsiz ötüşməyəcək.
- Əminliklə demək olar ki, "Sent-Etyen" azarkeşləri Fransada ən yaxşılardandı. Bu amil Ağdam klubunun oyununa nə dərəcədə təsir edə bilər?
- "Qarabağ" təcrübəli komandadı. Adlı-sanlı klublara qarşı səfərdə oynayıb. Təbii ki, rəqib bu oyuna böyük motivasiya ilə çıxacaq. Amma azarkeş amilinin ağdamlılar üçün böyük təhlükə olduğunu düşünmürəm. Yeganə təsiredici məqam kimi, erməni təxribatını qeyd edə bilərəm. Çünki Fransada erməni diasporu çox güclüdü. Amma əminəm ki, məşqçilər korpusu futbolçularla bu barədə də söhbət edəcək. Komanda hansısa təxribata da hazır olmalıdı.
- Bu oyuna proqnozunuz necədi?
- Demək çətindi. Amma məndə belə bir hiss var ki, qollu heç-heçə olacaq.
- Yığmamızın yeni baş məşqçisi böyük ehtimalla Robert Prosineçki olacaq. O, bu gün "Qarabağ"ın da oyununa gələcək. Sizcə, "Qarabağ" xorvatiyalı mütəxəssisi təəccübləndirə biləcək?
- Komandamızın Avropa Liqasının qrup mərhələsində oynaması onsuz da Prosineçkini təəccübləndirib.
