Topaz Premyer Liqasında 12-ci tur həyəcanı

Topaz Premyer Liqasında yaranan fasilə bu gün başa çatacaq. Azerisport.az xəbər verir ki, eyni gündə keçiriləcək 12-ci turda 4 oyun baş tutacaq. 

Turun açılış oyununda autsayder “Bakı” son çempion “Qarabağ”ı qəbul edəcək. "Araz Naxçıvan"ın çempionatdan kənarlaşdırılması tam rəsmiləşəndən sonra bu iki komanda fərqli aqibətlərlə üzləşdi. Ağdam klubu zirvəni tərk edib ikinci yerə düşdüsə, "zolaqlılar" sonunculuğu qəbul etdi. İndi "zolaqlılar" turnir cədvəlinin "zirzəmi"sindən çıxmaq, Ağdam klubu isə zirvəyə yüksəlmək üçün çalışacaq. Son ölkə çempionu 48-ci dəfə qarşılaşacağı rəqiblə maçlarda üstün durumdadı. Bu komanda 17 qələbə qazanıb. "Bakı" 15 dəfə qalib gəldiyi halda, eyni sayda da heç-heçə qeydə alınıb. Lakin ağdamlılar son iki görüşdə 1 xalla kifayətlənib. Üstəlik, paytaxtın eyniadlı təmsilçisi öz meydanında 2 görüşdür uduzmur. Topların fərqində də Ağdam təmsilçisi üstündü - 60:50. İlk dövrədə bu komandalarının duelinin 2:2 hesabıyla başa çatdığını da qeyd edək.

Ardından AZAL Şüvəlanda “Qəbələ”ni qəbul edəcək. "Araz Naxçıvan"ın çempionatdan imtina etməsindən ən böyük əziyyət çəkən, altı xalı silinən Dorinel Muntyanunun komandası səfərdə oynamasına baxmayaraq, mütləq qələbə qazanmağa borcludu. Bu, həm də sözügedən komandanın ilk dövrədə Qəbələdəki 1:2 hesablı yenilgisinin qisasını almaq baxımından önəm daşıyır. Amma Tərlan Əhmədovun komandası doğma meydanda məğlub olmağa hazırlaşmır. Həm də nəzərə almaq lazımdı ki, yubiley - 20-ci qarşılaşma ərəfəsində AZAL üstünlüyə malikdi. Bu komanda əvvəlki duellərin 8-də qələbə qazanıb. 6 oyunda heç-heçə qeydə alındığı halda, 5 dəfə də bölgə təmsilçisi 3 xala sevinən tərəf olub. Lakin bakılılar son iki ev qarşılaşmasında məğlub olub. Paytaxt təmsilçisi öz meydanındakı son 5 qarşılaşmada meydanı qolsuz tərk etməyib. Top fərqində də "təyyarəçilər" üstündülər - 28:16.

Məlum "Araz Naxçıvan" əhvalatından sonra liderlik kürsüsünə oturan “Neftçi” səfərdə “Simurq”un qonağı olacaq. Maraqlıdı ki, “Neftçi” indiyədək Zaqatalada məğlub olmayıb. Ümumilikdə cəmi 1 qələbəsi olan “Simurq” son 4 ev matçında qola da həsrət qalıb. Bu komandaların duellərində 6 heç-heçə olduğu halda, 14 görüşdə də bakılılar üstün olublar. Top fərqində də "ağ-qaralar"ın böyük üstünlüyü var - 31:8. İlk dövrədəki oyunda "Neftçi" Bakıda 2:1 hesablı qələbəni bayram etmişdi. Bu üzdən "Simurq" həm yeni mövsümdəki məğlubiyyəti, həm tarixi ərzində bu rəqibi ilə duellərdəki uğursuzluğu unutdurmağa çalışacaq, həm də turnir cədvəlindəki vəziyyətini yaxşılaşdırmağa cəhd göstərəcək.

Nəhayət, turun qapanış matçında “İnter” “Xəzər Lənkəran”la üz-üzə gələcək. Cənublularla oyunlarda üstünlüyə malik olan paytaxt təmsilçisi yubiley - 10-cu qələbənin astanasındadır. 30-cu duel öncəsi meydan sahibləri son 4 ev matçında qol da buraxmayıb. 15 qarşılaşmada tərəflər sülhə imza atdığı halda, 5 görüşdə də "ağ-yaşıllar" qələbəni bayram ediblər. Top fərqi də paytaxt təmsilçisinin xeyrinədi - 30:25. İlk dövrədəki oyunda isə "Xəzər Lənkəran" "İnter"ə 1:0 hesabıyla qalib gəlmişdi. 

Topaz Premyer Liqası
12-ci tur
20 noyabr

14:00. Bakı - Qarabağ
Hakimlər: Orxan Məmmədov, Elman Musayev, Munis Abdullayev, Teymur Fərhadov.
AFFA nümayəndəsi: Eldar Qasımov.
Hakim-inspektor: Şahin Cəfərov.
“Bakı” FK-nın təlim-məşq bazasının stadionu.

16:00. AZAL - Qəbələ
Hakimlər: Ömər Paşayev, Namiq Hüseynov, Coşqun Həsənov, Fərid Məmmədov.
Əlavə köməkçi hakimlər: Elvin Əsgərov, Feyzulla Feyzullayev.
AFFA nümayəndəsi: Telman Əzizov.
Hakim-inspektor: Murad Məmmədov.
Bakı. “AZAL Arena”.

17:00. Simurq - Neftçi
Hakimlər: Fariz Yusifov, Azər Əsgərov, Mübariz Haşımov, Sərxan İsmayılov.
Əlavə köməkçi hakimlər: İnqilab Məmmədov, Ramil Diniyev.
AFFA nümayəndəsi: Əsgər Əmirəliyev.
Hakim-inspektor: Füzuli Nəcəfov.
Zaqatala şəhər Olimpiya kompleksinin stadionu.

18:00. İnter - Xəzər Lənkəran
Hakimlər: Rəhim Həsənov, Yaşar Abbasov, Nahid Əliyev, Mahir Məmmədov.
Əlavə köməkçi hakimlər: Ramil Əhmədov, Vüsal Əliyev.
AFFA nümayəndəsi: Rauf Əmirov.
Hakim-inspektor: Məlik Həsənov.
Bakı. “İnter Arena”.
 

Bombardirlər:
5 - Nurlan Novruzov (Bakı), Mikel Alvaro (İnter), Məhəmməd Qurbanov (Sumqayıt).
3 - Rəşad Eyyubov (Simurq), Cavid Hüseynov (Qəbələ).