Buranello: Araz Dinaya qalib gələcək
Futzal üzrə Azərbaycan çempionu "Araz"ın qapıçısı Covanni Buranellonun azerisport.az saytına müsahibəsi
- UEFA Kubokunun elit mərhələsindəki start matçınızda Slovakiya "Slom-Matik"inə məğlubiyyətiniz gözlənilməz oldu...
- Təəssüf ki, belə alındı. Bizim o qədər qol epizodumuz oldu, amma bunu hesabda əks etdirə bilmədik. Bəlkə də 10 real qol şansımız oldu. Amma vura bilmədik.
- Hesabı rəqib açsa da, 2:1 hesabıyla önə keçmişdiz. Üstünlüyünüzü qorumaq çox çətin idi?
- Yenə qol vurmaq, daha yaxşı hesabla qalib gəlmək istəyirdik. Amma bizim çoxsaylı qol epizodunu boşa verməyimiz "Slov-Matik"i daha da ruhlandırdı və qələbə qazandılar. Bu, doğrudan da çox üzücüdü.
- Oyundan sonra baş məşqçi Tino Peres, futzal federasiyasının prezidenti Zaur Axundov komanda üzvlərinə nə dedi?
- Onlar öz işlərini gördülər. Onlara hörmət edirik. Oyunçular da əllərindən gələni etdilər ki, müsbət nəticə qazanaq. Gözəl oynasaq da, bu qədər qol epizodunu boşa verməyimiz məğlubiyyətlə nəticələndi.
- Bu gün sizi Rusiya "Dina"sı ilə oyun gözləyir...
- Müsbət nəticə qazanmaq istəyirik. Çalışacağıq ki, slovaklarla oyunda buraxdığımız səhvləri təkrarlamayaq. Ümid edirəm ki, ələ düşən şanslarımızdan maksimum yararlana biləcəyik. "Dina"ya qalib gələcəyimizə inanıram.
- Amma məğlubiyyət sizin Dördlər Finalına yolunuzu bağlayacaq...
- Biz də bunu gözəl başa düşürük. Amma biz öz şansımızdan yararlanmaq istəyirik. Əziyyətimizin bəhrəsini görəcəyik.
