Elvin Yunuszadə: 3-cü yer uğrunda mübarizəmiz 90 faiz başa çatıb

Futbol üzrə Azərbaycan yığmasının müdafiəçisi Elvin Yunuszadənin azerisport.az saytına müsahibəsi

- Norveçə məğlubiyyəti nə ilə izah edə bilərsiz?
- Bilirdik ki, çətin oyun olacaq. Çünki norveçlilərin gücündən xəbərdar idik. Uduzduq, amma pis oynadığımızı düşünmürəm. Hətta yaxşı oynadıq. Bu, hardasa gələcəyə ümidlə baxmağa əsas verir. Azarkeşləri sevindirməyi çox istəyirdik. Təəssüf ki, alınmadı.

- Yenə standart vəziyyətdən qol buraxdız...
- Hə. Son vaxtlar standart vəziyyətlərdən çoxlu qollar buraxırıq. Bunun üzərində daha çox işləməyimiz lazımdı.

- Mahmud Qurbanovun gəlişindən sonra komandada nə dəyişiklik oldu?
- Sadəcə, bir söz deyə bilərəm ki, bu gün biz topla daha çox oynadıq, nəinki əvvəlki oyunlarımızda. Həm də sonadək mübarizə apardıq.

- Qarşıdakı oyunlardan nə gözləyirsiz?
- Bizi böyük fasilə gözləyir. Odu ki, hazırlıq üçün zamanımız olacaq. Səhvlərimiz üzərində işləməliyik.

- Artıq üçüncü yer uğrunda mübarizəni yaddan çıxarmaq olar?
- Bunun fərqi yoxdu. Hər oyuna çıxıb oynamaq, sonadək mübarizə aparmaq lazımdı. Amma üçüncü yeri tutmaq üçün şansımızın 90 faizini itirdiyimiz aydındı.

- Yəqin ki, milliyə yenə əcnəbi baş məşqçi gələcək...
- Kim gəlsə, hörmətlə yanaşacağıq.

- Ruslan Abışov əvəzlənərkən meydanı gec tərk etdiyinə görə azarkeşlər tərəfindən fitə basıldı. Siz bunu necə qarşıladız?
- İnanmıram ki, o, bunu qəsdən etsin. Böyük ehtimalla yorğun imiş. Onun xarakterinə bələdik, heç vaxt elə şey etməzdi.