Hoqmo: Azərbaycan bizə qarşı Bolqarıstanla görüşdəki kimi oynadı
Futbol üzrə Norveç yığmasının baş məşqçisi Per-Matias Hoqmo AÇ-2016-nın seçmə mərhələsi çərçivəsində Azərbaycana qarşı keçirilmiş oyunla bağlı fikirlərini açıqlayıb. Azerisport.az xəbər verir ki, o, 1:0 hesabıyla qalib gəldikləri oyundan sonra bunları söyləyib:
- Oyunçularımla fəxr edirəm. Tatkiki planda uğurla oynadıq. Başqa qol vəziyyətlərimiz də oldu, amma cəmi bir dəfə fərqlənə bildik. Üstünlük daha çox rəqibdə idi. Çünki onların yeni baş məşqçisi var. Qazonun vəziyyəti hər iki komandaya mane olurdu. Artıq 9 xalımız var. Bu, qrupdan çıxmaq üçün yaxşı şansdı.
- İndi sizin üçün Norveç yığmasının qələbəsi daha vacibdi, yoxsa Maqnus Karlsenin?
- Karlseni təbrik edirəm. Norveç xalqı üçün hər iki qələbə vacibdi. Təəssüf ki, Maqnus Norveç yığmasında oynayacaq qədər güclü deyil.
- Azərbaycan yığması Bolqarıstanla oyunla müqayisədə necə təsir bağışladı?
- Bolqarıstanla oyunda Azərbaycan yaxşı oynamışdı. Çox sərt oyun idi. Komandanız bu gün elə oynadı. Amma şadam ki, belə çətin rəqiblə oyundan qələbə ilə ayrıldıq.
