Atletikonun baş məşqçisi: Başa düşə bilmirəm ki, Amit niyə milliyə çağırılmır?

Portuqliyanın "Atletiko" klubunun baş məşqçisi Rui Nasimentonun azerisport.az saytına müsahibəsi

- Komandanızın heyətində bir azərbaycanlı futbolçu çıxış edir. Amit Quluzadədən razısız?
- Əlbəttə. O, çox yaxşı futbolçudu. Əgər elitaya yüksəlsək, onu mütləq heyətdə saxlayacağıq. Çünki o, gənc və istedadlı oyunçudu. Əlbəttə, ona əvvəllər dil bilmədiyinə görə bir qədər çətin idi. Bu üzdən ilk 2-3 həftədə onda heç nə alınmırdı. Amma səbr nümayiş etdirdi və artıq hər şey qaydasındadı. İndi bizi hər şey qane edir. Amit daha yaxşı oynamaq üçün səylə çalışır. Onu parlaq gələcək gözləyir. Portuqaliyada uğurla çıxış edən gənc futbolçuların sırasında onun da adı var.

- Sizcə, Amitin "Sportinq", "Portu", "Braqa" kimi klublarda çıxış edəcək potensialı var?
- Şübhəsiz. Əminəm ki, o, bizə böyük fayda verəcək. Onda hələ hər şey qarşıdadı. Gələcəkdə daha böyük klublarda çıxış edə bilər. Amma mən bir şeyi qətiyyən başa düşmədim ki, belə bir futbolçunu necə ölkənin əsas yığmasına dəvət etmirlər. Şəxsən mən ona hər oyunda güvənirəm. Fikrimcə, bir il sonra o, Portuqaliyanın daha güclü klublarında çıxış edə biləcək səviyyədə olacaq.

- Azərbaycan futbolu haqda nə bilirsiz?
- Son illərdəki inkişafı yüksək qiymətləndirirəm. Fikrimcə, bu templə 5-10 ildən sonra daha böyük uğurlara ümid edə bilərsiz. Azərbaycan - Portuqaliya oyununu yaxşı xatırlayıram. O vaxt millimiz çətinliklə 3 xal qazana bildi.

- Azərbacyan futbolundan kimləri tanıyırsız?
- Yalnız Amit Quluzadəni və sizi (gülür).