Dmitri Kruqlov: Azərbaycan yığması Norveçi məğlub edəcək gücdədi

Futbol üzrə Estoniya yığmasının müdafiəçisi, "Neftçi", "İnter" və "Rəvan"ın sabiq futbolçusu Dmitri Kruqlovun azerisport.az saytına müsahibəsi

- Bir neçə gün öncə yoxlama oyununda qalib gəldiyiniz Norveçlə görüş haqda nə deyə bilərsiz?
- Onların yaxşı komandası, səviyyəli futbolçuları var. Deməzdim ki, tipik Skandinaviya komandasıdı. Topla oynamağı xoşlayırlar, sadəcə, asmalara bel bağlamırlar. Ona görə də bu komandaya qarşı mübarizə aparmaq çətin idi.

- Bəs Estoniya bu komandanı necə məğlub etdi?
- Biz sadəcə, müdafiədə diqqətli oynadıq və ələ düşən şanslardan maksimum yararlanmağa çalışdıq.

- Sizcə, sabah yığmamızın qonağı olacaq Norveçi nəyin sayəsində məğlub edə bilərik?
- Fikrimcə, Azərbaycan yığması üçün doğma meydan amili böyük üstünlük olacaq. Komandanızın bu rəqibə qalib gəlmək üçün yetərli gücə malik olduğunu hesab edirəm.

- Norveç yığmasının 15 yaşlı istedadı Martin Edeqor haqda nə deyə bilərsiz?
- Böyük istedada malikdi, sol ayağı ilə güclü zərbələri var. İstənilən komanda üçün başağrısı ola bilər. Bizə qarşı ikinci hissədə meydana çıxdı. Amma ona qarşı fərdi olaraq kimisə oynatmadıq. Komanda oyunu sayəsində qalib gəldik.

- Azərbaycan yığmasının nəticələrindən xəbəriniz var?
- Bəs necə? Ölkənizdə neçə il keçirmişəm. Bilirəm ki, komandanı hazırda Mahmud Qurbanov çalışdırır. Onunla dostluq münasibətlərim var. Əla insandı. Onu müvəqqəti təyin ediblər?

- Bəli, bir oyunluq...
- Fikrimcə, yığmanız Norveçlə oyunda uğur qazansa, onu həmin postda saxlamaq haqda düşünmək olar.

- Bəs Qurban Qurbanov?
- Qurban Qurbanovun da uğurlarından xəbərim var. Amma onun "Qarabağ"ı buraxıb, yığmaya gedəcəyinə inanmıram.