"Azərbaycanla oyunda qol vəziyyətlərini boşa verə bilmərik"

Futbol üzrı Norveç yığmasının qapıçısı Eryan-Hoşold Nyulann AÇ-2016-nın seçmə mərhələsi çərçivəsində Azərbaycan millisinə qarşı keçirəcəkləri oyun öncəsi fikirlərini açıqlayıb. Azerisport.az xəbər verir ki, o, bunları söyləyib:

"Şübhəsiz ki, Estoniya ilə yoxlama oyununda qol buraxdığımız epizodda mənim də günahım vardı. Amma biz kifayət qədər yaxşı komandayıq. Fikrimcə, həmin oyun da bizim xeyrimizə oldu və uduzsaq belə, irəliyə doğru bir addım atmış olduq".

Nyulann estonlara məğlubiyyətin səbəblərindən danışıb: "Əsas səbəb əlimizə düşən qol vəziyyətlərindən lazımınca yararlana bilməməyimizdi. Biz rəqib qapısı qarşısında az qol vəziyyəti yaratmadıq. Amma onların heç birindən istifadə edə bilmədik. Azərbaycanla oyunda da qol vəziyyətlərini belə boşa versək, Bakıda da xal itirəcəyik".

"Molde" klubunun 24 yaşlı qapıçısı hesab edir ki, Norveç yığması AÇ-2016-nın final mərhələsinə vəsiqə qazana bilər: "Biz seçmə mərhələyə pis başlamamışıq. Artıq hesabımızda iki qələbə var. Bu baxımdan Bakıdakı oyun bizim üçün çox vacibdi. Xal itirmək şansımız yoxdu".

Qeyd edək ki, Azərbaycan - Norveç matçı noyabrın 16-da "Bakcell Arena"da keçiriləcək və saat 21:00-da start götürəcək.