Ramaldanov: Norveçin Estoniyaya məğlub olması bizə də uduzacağından xəbər vermir

Futbol üzrə Azərbaycan yığmasının müdafiəçisi Rasim Ramaldanovun azerisport.az saytına müsahibəsi

- Norveçlə oyuna hazırlıq necə gedir?
- Hər şey yaxşıdı. Komandada əla atmosfer var. Məşqçilərin bütün tapşırıqlarını yerinə yetirməyə çalışırıq.

- Yığmamızı Norveçlə oyuna hazır saymaq olar?
- Hələ yox. Çünki qarşımızda başqa hədəflər də var. Onları da həyata keçirdikdən sonra özümüzü hazır saya bilərik.

- Norveçin Estoniya ilə yoxlama oyununa baxdız?
- Xeyr. Amma yəqin ki, həmin matçın videoyazısını bizə göstərəcəklər.

- Estoniyanın səfərdə məğlub etdiyi komandanı biz doğma meydanda məğlub etməyə borclu deyilikmi?
- Belə müqayisə düzgün deyil. Futbolda hər şey ola bilər. Əgər norveçlilər estonlara uduzublarsa, bu, o demək deyil ki, onlar bizə də məğlub olmalıdılar.

- Düşünmürsüz ki, Norveç yığması Bakıya pis əhval-ruhiyyədə gələcək?
- Xeyr. Çünki bu, sadəcə, yoxlama oyunu idi. Düşünmürəm ki, bu, onlara hansısa mənfi təsir göstərsin.

- Psixoloji üstünlük kimdə olacaq?
- Mənə elə gəlir ki, bizdə. Çünki bu, bizim qrupda üçüncü yeri tutmaq üçün son şansımızdı. Ona görə də qol vurmaq, qələbə qazanmaq lazımdı.

- Sizcə, bizim qrup üçüncüsü olmaq şansımız qalır?
- Əlbəttə. Bu, arzu deyil. Bizim hələ də üçüncü yeri tutmaq şansımız qalmaqdadı. Necə deyərlər, ümid sonda ölür.

- Berti Foqtsun gedişindən sonra komandada nə dəyişib?
- Bu suala cavab vermək istəmirəm. Komandamızda həmişə yaxşı atmosfer olub.

- Son sualımız klubdakı işlərinizlə bağlıdı. Son vaxtlar əsas heyətdə meydana çıxmırsız. Bu, nə ilə bağlıdı?
- Bu, baş məşqçinin qərarı ilə bağlıdı. Amma mən hadisələri qabaqlamaq fikrində deyiləm. Klubumu dəyişmək haqda da düşünmürəm. Sadəcə, əlimdən gələni edəcəm ki, daha çox oyun təcrübəsi qazanım.