Pavol Farkaş: Azərbaycanda bunu gözləmirdim
"Qəbələ"nin slovakiyalı müdafiəçisi Pavol Farkaş ölkəsinin mətbuatına müsahibə verib. Azerisport.az sizi sözügedən futbolçunun açıqlamaları ilə tanış edir.
"Bura gəldiyimə görə qətiyyən peşman deyiləm. Azərbaycanda oynamağımı geriyə addım hesab etmirəm. Mənim üçün yeganə təəssüfləndirici məqam A Seriyasında möhkəmlənə bilməməyimdi. Amma həmişə irəliyə baxmaq lazımdı".
Farkaş Azərbaycanın slovaklar üçün o qədər də tanınmış ölkə olmadığını etiraf edib: "Burada tam fərqli mədəniyyət, mentalitet var. Azərbaycanın müasir ölkə olması doğrudumu? Tam olmasa da, elədi. Paytaxt çox gözəldi. Bakı gündən-günə yenilənir. Amma digər şəhərlər barədə eyni sözləri demək çətindi".
"Qəbələ"nin futbolçusu Azərbaycanda bu idman növünün inkişaf etdiyini dilə gətirib: "Fikrimcə, burada inkişaf var. "Qarabağ"ın Avropa Liqasının qrup mərhələsindəki çıxışı buna əyani sübutdu. Klubların iqtisadi vəziyyəti də kifayət qədər yaxşıdı, hətta deyərdim ki, məni təəccübləndirdi. Mən bunu gözləmirdim".
"Buradakı stadionlar normal vəziyyətdədi. Amma böyük azarkeş marağının olduğunu deməzdim. Qəbələdəki oyunlarımıza 2-3 min azarkeş gəlir".
"Qəbələ" hazırda çempionatda dördüncü yerdə getsə də, şəraitinə görə Azərbaycanın ən yaxşı klublarından biridi. Bazamızda əla qazona malik yeddi meydança var. Biz futbolçulara yalnız məşq və oyunlara köklənmək qalır".
"Yığma haqda düşünürəmmi? Əlbəttə. Slovakiya yığmasının müdafiəçi baxımından seçim imkanı çox olsa da, mən istənilən halda əsas millidə oynamaq üçün mübarizə aparıram".
