Rahid Əmirquliyev: Norveçə qalib gəlməkdən başqa çıxış yolumuz yoxdu

Futbol üzrə Azərbaycan yığmasının və "Xəzər Lənkəran"ın yarımmüdafiəçisi Rahid Əmirquliyevin azerisport.az saytına müsahibəsi

- Azərbaycanın gənclərdən ibarət yığması üzərində qazandığınız qələbə (4:2) ilə bağlı nə deyə bilərsiz?
- Bu oyunu gərgin məşq prosesi fonunda keçirdik. Fikrimcə, pis alınmadı. Əsas tatkiki gedişlər üzərində çalışmaq idi. Bu oyun bizim Norveçlə oyuna daha yaxşı hazırlaşmağımıza kömək edəcək.

- Komandada atmosfer nə dərəcədə dəyişib?
- Yığmada atmosfer həmişə yaxşı olub. Biz bütün matçlara yüksək səviyyədə hazırlaşmışıq. Bu dəfə də elə olacaq. Xüsusi heç nə dəyişməyib.

- Berti Foqtsun gedişi də heç nəyi dəyişməyib?
- Foqtsun dövründə komandada heç bir sərbəstlik yox idi. İndi müəyyən sərbəstlik var.

- Yığma heç də yaxşı günlərini yaşamır. Norveçlə oyunda komandadan nə gözləmək olar?
- Komanda hazırlığı davam etdirir. Daha bir neçə gün vaxtımız var. Meydana 3 xal qazanmaq üçün çıxacağıq. Üç məğlubiyyətdən, xüsusilə, Xorvatiyadakı nəticədən sonra bizim qələbə qazanmaqdan başqa çıxış yolumuz yoxdu.

- "Xəzər Lənkəran" son turlarda artırıb. Bu, yığmadakı çıxışınıza təsir edə bilər?
- Yığmada klubdakı işlərimizi unutmağa çalışırıq. Amma son turlarda komandamız təbii ki, yaxşı nəticələr qazanır. Əsas qələbə qazanmağa davam etməkdi. Yığmada da qələbə seriyasına başlasaydıq, lap yaxşı olardı.