Bernard Lippert: Foqtsdan danışmaq istəmirəm

21 yaşadək futbolçulardan ibarət Azərbaycan yığmasının baş məşqçisi Bernard Lippert bu gün əsas millimizə qarşı keçirdikləri yoxlama oyunundan danışıb. Azerisport.az xəbər verir ki, o, 2:4 hesablı yenilgi ilə bağlı öncə bunları söyləyib:

"Bu oyun bizim üçün vacib idi. Qarşıda bizi Malta ilə yoxlama oyunu gözləyir. Bu oyunla həm də Norveçlə görüşə hazırlaşan əsas milliyə yardımçı olduq. Şəxsən mən daha çox öz komandamın oyununa diqqət yetirdiyimdən əsas komandadakı dəyişikliklərə fikir vermirdim. Fikrimcə, biz ikinci hissədə birinciyə nisbətən daha yaxşı oynadıq".

Lippert U-21-ə cəlb olunan yeni milliləşdirilmiş futbolçu - Maksim Demençukla bağlı bunları söyləyib: "Mənə onu azərbaycanlı kimi təqdim ediblər. Oyunu xoşuma gəldi".

Gənclər millimizin çalışdırıcısı qarşıdakı Malta ilə görüşdən də danışıb: "Mənim üçün zəif rəqib yoxdu, zəif hazırlıq var. Biz indi yeni komanda yaratmağa çalışırıq. Bəzi heyət problemlərimiz var. Ona görə də Malta ilə qarşılaşmağa qərar verdik. Malta dişimizə görə rəqibdi".

Bir müddət öncə almaniyalı mütəxəssis istefa verəcəyini açıqlamışdı. O, bu məsələyə də qayıdıb: "Düzdü, istefa vermişdim, amma hələ yığmadayam. Hər şeyə ilin sonunda qərar verəcəyik. Burada çalışmaq xoşuma gəlir. Təklif olsa, yenidən ona baxmağım istisna deyil".

Lippert həmyerlisi Berti Foqtsun millimizdən gedişinə də toxunub: "Foqtsdan danışmaq istəmirəm. O, bu qərarı özü qəbul edib".