Bədavi Hüseynov: Millidə yerli mütəxəssisə şans vermək olar

"Qarabağ"ın müdafiəçisi Bədavi Hüseynovun azerisport.az saytına müsahibəsi

- "Dnepr"ə məğlubiyyətdən sonra özünüzə gələ bilmisiz?
- Bəli. Buna məcburuq. Biz klubdakı işlərimizi unudub, yığmanın növbəti oyununa köklənməliyik. Ukrayna klubu ilə oyunumuz çox çətin keçdi. Məğlubiyyətə baxmayaraq, kifayət qədər layiqli mübarizə apardığımızı düşünürəm. Sadəcə, təcrübəmizin azlığı öz sözünü dedi.

- Demək olar ki, "Dnepr" sizi çox yaxşı analiz etmişdi?
- Bəli, demək olar. Bu dəfə onlar bizə qarşı daha yaxşı oynadılar. Əks-hücumlara çıxmağa imkan vermirdilər. Düzdü, buna rəğmən bəzi əks-hücumlarımız oldu. Sadəcə, onları qola çevirməyi bacarmadıq.

- Razısız ki, Nikola Kaliniçin vurduğu hər iki qolda siz buna imkan verməyə də bilərdiz?
- Kaliniç çox səviyyəli oyunçudu. Ucaboy olsa da, eyni zamanda da cəlddi. Biz ona xüsusi boşluq vermirdik. Amma buna baxmayaraq, hər iki imkandan yararlanaraq qol vura bildi.

- Reynaldonun son vaxtlar gerilədiyini düşünmürsüz?
- Heç nə deyə bilmərəm. O, bütü komanda kimi məşqlərdə sonadək çalışır. Özü də gözəl başa düşür ki, hamı ondan qol gözləyir. Sadəcə, bu futbolçunun dəstəkləmək lazımdı.

- "Sent-Etyen" və "İnter"lə oyunlarınızdan nə gözləyək?
- Qrupumuzdakı son iki oyunumuz ən təhlükəli rəqiblərimizə qarşı olacaq. Amma biz istənilən halda hər iki oyunda maksimum xal toplamaq üçün çalışacağıq.

- Azərbaycan yığmasının Norveçlə oyunundan nə gözləyirsiz?
- Hazırlaşırıq. Çətin olacaq. Norveçlilər asan rəqib deyil. Bütün diqqətimizi bu oyuna yönəltmişik. Azarkeşlərimizi sevindirməyə çalışacağıq.

- Sizcə, millimizi əcnəbi məşqçi çalışdırmalıdı, ya yerli?
- Mənə elə gəlir ki, yerli mütəxəssisə şans vermək olar. Amma kimin gətiriləcəyinə rəhbərlik qərar verir. Bu barədə heç bir söz deyə bilmərəm.