Maksim Medvedev: Dnepr taktikanı dəyişmişdi, ona görə oyunumuz alınmadı
“Qarabağ”ın futbolçusu Maksim Medvedev azerisport.az saytına müsahibəsində Avroliqanın qrup mərhələsində Bakıda “Dnepr”ə məğlub olduqları oyundan danışıb.
- “Qarabağ” ikinci hissədə özünə bənzəmədi. Ümumilikdə, oyun barədə fikirlərini bilmək maraqlı olardı...
- “Dnepr”in Bakıya 3 xal üçün gəldiyini bilirdik. Oyuna da yaxşı hazırlaşmışdıq. Sadəcə, rəqib gözlədiyimizdən yaxşı oynadı. Səfərdəki oyundan fərqli olaraq taktika dəyişmişdi. “Dnepr” ilk dəqiqələrdən hücum futbolu göstərdi. Biz onların belə oyununu gözləmirdik. Buna görə istədiyimizi göstərə bilmədik. İlk hissədə bir-iki şansımız olsa da, həmin vəziyyətləri dəyərləndirmədik. Nəticədə məğlub olduq.
- Bəlkə rəqib “Qarabağ”ı daha yaxşı təhlil edib....
- Bu fikirlə də razılaşmaq olar. Hər zaman meydanda rahat oynamışıq. Bu dəfə ötürmələrdə səhvlərimiz oldu. 90 dəqiqə ərzində səhvlərimiz az olmadı. Futbolda nəticəni səhvlər və dəqiq zərbələr həll edir. “Dnepr” istifadə etdi və 2 qol vurdu.
- Bəlkə “Qarabağ”da arxayınlıq özünü göstərdi...
- Razı deyiləm. Səfərdəki qələbəyə baxmayaraq oyunun çətin olacağı hamıya məlum idi. Biz özümüz də qələbəni unutmuşduq. “Dnepr” Avropanın güclü klublarından biridi. Heyətdə yaxşı futbolçuları var. Belə oyunda arxayınlıq ola bilməzdi.
- Futbolçularımız Konoplyanka və Kaliniçə qarşı oynamaqda çətinlik çəkirdi. Bu, səviyyə fərqidi, yoxsa?
- “Dnepr” iki futbolçudan ibarət deyil. Biz heç kimə qarşı fərdi oynamadıq. Komanda oyunu göstərməyə çalışdıq. Adını çəkdiyiniz futbolçular yüksək səviyyəli oyunçulardı. Sürətli hücumlar qurmaqla bizə problem yaradırdılar. Müəyyən mənada oyunumuzun alınmaması uduzmağımıza səbəb oldu. Rəqibin qol epizodu çox olmadı. Biz buna imkan vermədik.
- İndi “Qarabağ”ın pley-off şansları nisbətən azaldı...
- Biz əvvəldən bu barədə danışmağın əleyhinə olmuşuq. Meydana çıxıb öz oyunumuzu göstərməliyik. Nəticə özü gələcək. Əvvəlcədən pley-offa düşmək barədə düşünmək bizə mane olur.
- Qrupdakı son iki oyunda nəyə ümid etmək olar?
- “Sent-Etyen”lə səfər oyunumuz çətin olacaq. Demək olar ki, ikinci yerin taleyi müəyyən mənada Fransadakı oyundan da asılıdı. Həm səfərdə, həm də evdəki “İnter”lə oyunda yaxşı nəticə qazanmağa çalışmalıyıq.
