Ruslan Rotan: Qarabağla oyunda layiqli qələbə qazandıq

“Dnepr”in kapitanı Ruslan Rotan Avroliqanın qrup mərhələsində “Qarabağ”la oyundan sonra jurnalistlərin suallarına cavab verib. Azərisport.az xəbər verir ki, Rotan ümumilikdə oyundan razı qaldğını deyib:

“Gözlədiyimiz kimi, səfər matçı çətin oldu. Revanş barədə düşünmürdük. İndiki halda bizə xal lazım idi. Layiqli oyunla qələbə qazandıq. Orta sahədə rəqibə rahat oynamağa imkan vermirdik. “Qarabağ”ın oyunu haqda yalnız xoş sözləri deyə bilərəm. Yaxşı heyətə malik mübariz komandadı. Bu komanda bizə qarşı hər iki matçda yaxşı oyun sərgilədi. Heyətində olan legionerlərin oyunu seçilirdi. Biz qol vurandan sonra hesabı bərabərləşdirməyi bacardılar. Amma biz ikinci qol üçün çox səy göstərdik".

Rotan ilk oyundan fərqli olaraq Bakıda çoxlu sayda azarkeş qarşısında oynamağın asan olmadığını da deyib: “Kiyevdə stadionda bu qədər azarkeş yox idi. Məlum səbəblərdən bizim belə dəstəyimiz olmadı. “Qarabağ” üçün yaxşı atmosfer yaratmışdılar. Hər zaman səfər oyunları çətin olur. Lakin biz qələbə qazandıq və deməli güclü idik".

“Dnepr”in futbolçusu hər iki komandanın pley-offa çıxmaq şanslarının qaldığını bildirib: “Bu qələbədən sonra vəziyyətimiz bir qədər düzəldi. Amma son iki oyunda da uğur qazanmaq lazımdır. Qrupda iki oyun qalıb. İndidən kimin mübarizəni davam etdirəcəyini söyləmək çətindir. “Qarabağ” da şanslarını itirməyib".