Muarem: Ümid edirəm ki, növbəti iki oyunda Dneprə məğlubiyyəti unutduracağıq

"Qarabağ"ın yarımmüdafiəçisi Muarem Muaremin azerisport.az saytına müsahibəsi

- "Dnepr"ə məğlubiyyəti necə şərh edə bilərsiz?
- Çətin oyun olacağını bilirdik. Çünki Kiyevdəki oyunda da oxşar çətinliklər yaşamışdıq. Amma biz yenicə öz oyunumuzu sərgiləməyə başladığımız vaxt rəqib hesabı açdı. Düzdü, bu qol bizi sındırmadı, hücumlarımızı davam etdirdik, qol vurduq. Başqa da şanslarımız vardı. Təəssüf ki, biz onları dəyərləndirə bilmədik.

- "Qarabağ" sanki yorğun görünürdü...
- Xeyr, heç bir yorğunluq yox idi. İkinci hissədə müdafiədən oynamağa başladıq. İnanın ki, bu məğlubiyyətə görə çox məyusuq. Çox istədik ki, belə bir məğlubiyyətlə üzləşməyək. Ukraynalıları qələbə münasibətilə təbrik edirəm. Bizim qarşıda daha iki oyunumuz var.

- İlk hissədə "Dnepr"in cərimə meydançasında iki qayda pozuntusu olsa da, hakim bunu qeydə almadı. Siz həmin epizoda yaxın idiz, orada penalti var idi?
- Mən bu barədə hakimdən də soruşdum ki, niyə aşkar qayda pozuntusunu qeydə almırsan. O, bildirdi ki, həmin epizodu yaxşı görə bilməyib, mümkündü ki, penalti var idi. Belədə ondan qapı arxasındakı hakimdən soruşmağı xahiş etsəm də, buna fikir vermədi. Nə demək olar?

- "Sent-Etyen" və "İnter"lə oyunlardakı şanslarınızı necə qiymətləndirirsiz?
- Çox ümid edirəm ki, müsbət nəticə qazanıb, "Dnepr"ə məğlubiyyəti unutdura biləcəyik.

- Bu oyunda özünüzə bənzəmirdiz. Nə baş vermişdi?
- Birinci hissədə hamımız yaxşı oynadıq. İkinci hissədə isə müdafiəyə çəkildik. Təəssüf ki, bu addım özünü doğrultmadı. Çoxlu səhvlər buraxdıq. Mən də tez-tez səhv edirdim. Ona görə oyunum alınmadı.