Samir Əliyev: Qarabağ Dnepri növbəti dəfə məğlub edəcək gücdədi

Futbol üzrə Azərbaycan yığmasının sabiq hücumçusu Samir Əliyevin azerisport.az saytına müsahibəsi

- "Qarabağ" bu gün Avropa Liqasının qrup mərhələsi çərçivəsində Ukrayna "Dnepr"ini qəbul edəcək. Bu oyundan nə gözləyirsiz?
- "Qarabağ"ın Kiyevdə qələbə qazanacağını çox az adam gözləyirdi. Etiraf edim ki, mən də pessimist düşünənlər sırasındaydım. Amma komandamız əla oyun sərgiləyərək qələbə qazandılar. İndi daha çətin oyun olacaq. Lakin "Qarabağ" yenə qələbə qazanacaq gücdədi. Komandamızın azarkeşlərin dəstəyinə ehtiyacı var.

- Siz də Bakıdakı oyunun Kiyevdəkindən daha çətin keçəcəyini dediz. Niyə belə düşünürsüz?
- "Dnepr" Bakıya üç xal üçün gəlib. Çünki rəqib qrupdan çıxmaq şansını saxlamaq istəyindədi. Lakin komandamız üçün də vacib görüşdü. "Qarabağ" məğlub olsa, qrupdan çıxmaq şansını itirə bilər.

- "Qarabağ" Bakıda hansı taktika ilə oynamalıdı?
- Bunu Qurban Qurbanov daha yaxşı bilər.

- Reynaldonun son dövrlər qol vura bilməməsi nə ilə bağlıdı? O, Avroliqanın qrup mərhələsində bir dəfə də fərqlənə bilməyib...
- Reynaldo "Qarabağ"ın ən aparıcı futbolçularından biridi. Amma burada komandanın hansı rəqiblərə qarşı mübarizə apardığını da nəzərə almaq lazımdı. Belə komandalara qol vurmaq heç də asan deyil. Həm də kimin qol vurması önəmli deyi, əsas komandanın nəticəsidi. Əlbəttə, o da qol vursa, lap yaxşı olar.

- "Qarabağ"ın bu qrupdan çıxması realdı?
- Əlbəttə. "Dnepr"ə qalib gəlsələr, şanslar daha da artacaq.

- Yığmamızın AÇ-2016-nın seçmə mərhələsi çərçivəsində Norveçlə oyunda uğur qazanacağına inanırsız?
- Yığmamızın Norveçə qalib gəlməsini çox istərdim. Çünki millini bu oyunda Mahmud Qurbanov çıxaracaq. Fikrimcə, komandamız buna nail olacaq gücdədi.

- Qələbə Qurbanovun yığmanın sükanı arxasında qalmasına kömək edə bilər?
- Bilmirəm. Amma onun bu postda qalmasını istərdim. Artıq yerli mütəxəssislərə güvənmək vaxtıdı.